Prykładna tydzień tamu homielskaja aktyvistka «Maładych demakrataŭ» Alena Łuckovič daviedałasia, što jaje šukaje milicyja pa padazreńni ŭ kradziažy ŭ kramie. Videa vykłali homielskija pravaachoŭniki, a pa miascovym TB navat pakazali karotki siužet, pryśviečany «złačyncy».
Na videa vidać, jak hustoŭna žančyna chodzić z praduktovym košykam pa «Jeŭraopcie». Štości jana sapraŭdy pierakładvaje ci to ŭ sumku, ci to z sumki, praŭda, kiepska vidać, što mienavita. Milicyja zaklikaje ŭsich, chto paznaŭ žančynu, paviedamić pra heta pravaachoŭnikam.
Łuckovič paćviardžaje — tak, na videa sapraŭdy jana. Ale…
«Videa zaŭvažyła maja mama, — kaža Alena Łuckovič. — Ja spačatku chacieła pazvanić u milicyju, vyśvietlić, ale ja nie stała. Bo heta prosta śmiešna — kali niejki pikiet ci akcyja, to milicyja ŭ mianie na hanku adrazu. A tut try miesiacy mianie šukajuć i nie mohuć znajści. Ale milicyja dakładna viedaje chto ja, jak mianie zavuć, viedaje i adras, i mabilny.
Alena Łuckovič, fota z sacsietak
Ja nie razumieju, navošta im treba mianie źniasłavić na ŭvieś rajon.
Voś tolki ŭčora, kali ŭžo abmiarkoŭvali hetaje videa ŭ sacsietkach, mnie pazvaniŭ niejki ŭčastkovy, vietliva zaprasiŭ dać tłumačeńni. Schadžu, dam tyja tłumačeńni.
Naturalna, ničoha ja nie krała. Pa-pieršaje, ja i nie zajmajusia takim. A pa-druhoje, u kramie ž «piščałki» na vychadzie, adtul nichto ničoha niezaŭvažna nie vyniesie».
Łuckovič padazraje, što videa admysłova tak zmantavali. Kaža, u kramie byli i inšyja videakamiery, na jakich lepš vidać, što jana pierakładvaje. Ale zapis ź ich nie publikavali.
U homielskaj milicyi paviedamili, što kryminalnaja sprava jašče nie zaviedzienaja — pakul pravodzicca pravierka.
Pa słovach milicyjantaŭ, kali čałaviek paznaŭ siabie na videa, to jon moža pryjści ŭ adździaleńnie i pryznacca ŭ ździejśnienym złačynstvie. Kali ž złačynstva nie było, to hramadzianin moža padać skarhu na dziejańni pravaachoŭnikaŭ u prakuraturu.