Ekipažy ŭkrainskich karabloŭ, jakija čakajuć mahčymaści pierapłyć Kierčanski praliŭ, znachodziacca ŭ bajavoj hatoŭnaści i hatovyja da mahčymaj vysadki rasijskaha desantu.
Pra heta zajaviŭ kamandujučy Vajenna-marskich sił Ukrainy Ihar Varončanka ŭ Adesie, paviedamlaje radyjo «Svaboda».
«Našy ekipažy braniakatara znachodziacca ŭ bajavoj hatoŭnaści i hatovyja da mahčymaj vysadki (rasiejskaha - red.) desantu», - skazaŭ jon.
Varončanka acaniŭ abstanoŭku kala Kierčanskaha praliva jak «składanuju i napružanuju».
Pavodle jaho słoŭ, ciapier ciažka sprahnazavać, kolki času ŭkrainskim karablam pryjdziecca čakać mahčymaści pierasiekčy Kierčanski praliŭ.
U toj ža čas jon abvierh zajavy Rasii ab tym, što hetamu pieraškadžaje rasijskaje sudna, jakoje nibyta sieła na miel.
Fota «Kierč Info».
«Jany dziejničajuć tak, jak dziejničali ŭ 2014 hodzie ŭ buchcie Donuzłaŭ u Krymie, kali tapili svaje rasijskija karabli, i našy karabli nie mahli prajści. Na hety čas ni z pravaha, ni ź levaha boku my prajści nie možam», — paraŭnaŭ admirał.
Pavodle jaho źviestak, ciapier u rajonie Kierčanskaha mosta znachodziacca vosiem karabloŭ Rasii - dva sudny Čarnamorskaha fłota i šeść kataraŭ pamiežnaj słužby FSB.
Razam z tym, padkantrolnaje Kramlu vydańnie «Vieści Krym» paviedamlaje, što pad Kierčanskim mostam, pierakrytym dla ruchu sudoŭ, prajšło niekalki rasijskich karabloŭ.
«Rasijskija buksiry «pryciahnuli» da Krymskaha mosta suchahruz. Raźviarnuli jaho ŭpopierak farvataru, tym samym całkam pierakryŭšy ruch lubych sudoŭ. Na rejdzie stajać niekalki karabloŭ VMF Rasii. Na niekalki chvilin suchahruz prybrali, pad mostam, u bok Azoŭskaha mora, prajšli katary bierahavoj achovy Rasii, i suchahruz znoŭ pierakryŭ farvatar. Akvatoryju mora i praliva patrulujuć rasijskija šturmaviki SU-25», - piša vydańnie.
«Rasijanami nie prosta byŭ ździejśnieny taran buksira VMS, što pryviało da straty im častki kiravalnaści, ale i ažyćcioŭlena błakavańnie ŭsich karabloŭ hrupy z tym, kab jany nie mahli akazać dapamohu buksiru. Karabli RF ŭsialak pravakavali sudna VMS na adkryćcio ahniu», - adznačyŭ pastajanny pradstaŭnik prezidenta Ukrainy ŭ AR Krym Barys Babin.
