Amiałuška. Fota Volhi Hurskaj
Kali pabačanaja ptuška dobra tabie zapomniłasia abo ŭ ciabie atrymałasia jaje sfatahrafavać — adkryvaj mabilny vyznačalnik i abiraj z prapanavanych vidavočnyja paramietry: miesca i siezon nazirańnia, adnosnyja pamiery ptuški, kolery apiareńnia i noh, formu, pamiery i koler dziuby. Prahrama adfiltruje vidy pa hetych charaktarystykach, i ź niekalkich zdymkaŭ ty zmožaš vybrać pabačanuju ptušku.
Aplikacyja nazyvajecca «Ptushki — Opriedielitiel ptic Biełarusi».
U śpisie ptušak 325 vidaŭ, jakich možna sustreć u našaj krainie. Śpis možna sartavać pa ałfavicie (biełaruskim, ruskim abo łacinskim), a taksama pa hrupach (atradach): vierabjinyja asobna, husi i kački asobna i h.d.
Dla kožnaha vidu dajecca apisańnie, roznyja fota, zapis hołasu, adznačajucca asablivaści: naprykład, jak adroźnić samca, samku i maładuju ptušku.
Karyna Sałaviej, kiraŭnik adździeła raźvićcia APB:
Raspracoŭka mabilnaha dadatku — važnaja padzieja dla śvietu biordvočynhu ŭ Biełarusi. Heta pieršaja viersija, jašče zusim ptušania, i dziakujučy kamientaram, prapanovam i zaŭvaham karystalnikaŭ my płanujem jaho palepšyć i zrabić maksimalna zručnym. Biordvočynh — vydatnaje chobi dla dušy i cieła — nie paśpieješ azirnucca, jak prajšoŭ bolš za 6 kiłamietraŭ! Spadziajemsia, ciapier nazirać za ptuškami budzie krychu praściej — mabilny vyznačalnik dapamoža, kali pobač niama daśviedčanaha biordvočara abo knihi-vyznačalnika.
Hety mabilny dadatak unikalny dla Biełarusi, anałahaŭ jamu niama. Jon stvorany na bazie elektronnaha vyznačalnika florafauna.by, raspracavanaha Volhaj Jančurevič i Vitalom Sachvonam. Fota ptušak dla jaho zrabili Dźmitry Jakubovič, Alaksandr Vinčeŭski, Dźmitry Vinčeŭski, Alaksiej Padalakin i Valer Jurko.
Stvaryć mabilny vyznačalnik dapamahła kampanija EPAM. Admietna, što kaardynavaŭ raspracoŭku vyznačalnika vypusknik Akademii biordvočynhu pry APB.
Dzianis Karhin, raspracoŭščyk mabilnaha dadatku, Senior Experience Designer EPAM:
Ja nie byŭ da hetaha biordvočaram, ale padčas raspracoŭki skončyŭ Škołu biordvorčara-pačatkoŭca i Akademiju biordvočynhu, što mnie značna dapamahło: ja zrazumieŭ bolš, jak heta ŭsio pracuje, što patrebna ludziam padčas pošuku ptušak, jak robiacca nazirańni za ptuškami. Padčas raspracoŭki aplikacyi ja adkryŭ dla siabie samuju cikavuju, jarkuju ptušku — mandarynku, zdymak jakoj vykarystoŭvaŭsia dla pratatypaŭ. Samaje cikavaje ŭ vyznačalniku dla mianie — heta huki, bo ź ich dapamohaj možna pryvablivać ptušak. Kali ŭ nas narešcie atrymałasia pryviazać huki da aplikacyi, samym zajmalnym było pasłuchać ptušak, i ciapier ja čakaju nastupnaj viasny, kab pasprabavać zrabić heta ŭžyvuju.
Vyznačalnik ptušak možna biaspłatna spampavać u Play Market. Heta adzin ź pieršych relizaŭ mabilnaha dadatku, tamu ciapier asabliva važnyja kamientary i parady karystalnikaŭ. A my vykazvajem padziaku ŭsim, chto spryčyniŭsia da taho, kab jon pabačyŭ śviet.
Mabilny vyznačalnik ptušak Biełarusi — častka inicyjatyvy «Budź zdarovy z ptuškami!», jakaja realizujecca ŭ miežach prajekta mižnarodnaj techničnaj dapamohi «Prafiłaktyka nieinfiekcyjnych zachvorvańniaŭ, prasoŭvańnie zdarovaha ładu žyćcia i padtrymka madernizacyi sistemy achovy zdaroŭja ŭ Respublicy Biełaruś» («BIEŁMIED»), jaki finansujecca Jeŭrapiejskim Sajuzam i realizujecca PRAAN, SAAZ, JUNISIEF i JUNFPA u parniorstvie ź Ministerstvam achovy zdaroŭja Respubliki Biełaruś.
U miežach inicyjatyvy APB taksama praviała škoły biordvočaraŭ u Bresckaj i Homielskaj abłaściach, jakija skončyli bolš za 300 čałaviek, vypuściła knihu-vyznačalnik ptušak, zapuściła anłajn-kurs pa asnovach biordvočynhu «Ptuški horada».
