Viarchoŭnaja Rada Ukrainy na svaim pazačarhovym pasiadžeńni abviaściła ŭ krainie 30-dzionnaje vajennaje stanovišča ŭ suviazi z ahresijaj Rasii pablizu Kierčanskaha praliva.
Vajennaje stanovišča abvieščana na terytoryjach Vińnickaj vobłaści, Łuhanskaj, Mikałajeŭskaj, Adeskaj, Sumskaj, Charkaŭskaj, Čarnihaŭskaj, Chiersonskaj, Danieckaj, Zaparožskaj — hetyja vobłaści miažujuć z Rasijaj i Prydniastroŭjem.
Ranicaj 25 listapada pahraničny rasijski karabiel ažyćciaviŭ taran ukrainskaha rejdavaha buksira. U vyniku sutyknieńnia z rasijskimi pahraničnymi siłami ŭ Kierčanskim pralivie ranieńni atrymali šeść ukrainskich marakoŭ.
Va Ukrainie praviali ekstrannaje pasiadžeńnie Rady nacyjanalnaj biaśpieki i abarony (RNBA), u vyniku jakoha było rekamiendavana ŭvieści vajennaje stanovišča va Ukrainie na 60 sutak.
Parašenka padtrymaŭ uviadzieńnie vajennaha stanovišča i padpisaŭ adpaviedny ŭkaz. Ciapier Rada zaćvierdziła hety ŭkaz, u vyniku va Ukrainie abvieščana vajennaje stanovišča, praŭda nie na 60 dzion, a na 30. I nie va ŭsioj Ukrainie, a tolki ŭ asobnych abłaściach, jakija miažujuć z Rasijaj i Prydniastroŭjem.
U svaim telezvarocie Piatro Parašenka zajaviŭ, što vajennaje stanovišča nijak nie pieraškodzić praviadzieńniu prezidenckich vybaraŭ.
