Biełaruskija dziaržaŭnyja telekanały vystaŭlajuć na Jutub bolšaść svaich pieradač. U internecie jany pieravažna nie karystajucca papularnaściu.
«Kłub redaktaraŭ» ad Biełteleradyjokampanii — nie vyklučeńnie. Kolkaść prahladaŭ roznych vypuskaŭ u novym siezonie vyhladaje nastupnym čynam: 199 — 128 — 94 — 154 — 124 — 85.
Sumarnaja papularnaść šaści prahram, u jakich nie hučała alternatyŭnaha mierkavańnia, nie dasiahnuła navat 800 prahladaŭ.
Vypusk, udzielnikam jakoha staŭ redaktar «NN» Jahor Marcinovič, staŭ vyklučeńniem, pieradusim za košt uvahi da prahramy z boku niedziaržaŭnych ŚMI. Za niekalki dzion jon nabraŭ bolš za 2000 prahladaŭ.
Čytajcie. Redaktar «NN» na BT: Zisier i Zołatava zasłuhoŭvajuć zvańnia Hieroja Biełarusi, a nie kryminalnaj spravy VIDEA
U historyi «Kłuba redaktaraŭ» heta druhoje pa papularnaści videa na Jutubie. Admietna, što na pieršym miescy pakul zastajecca prahrama dvuchhadovaj daŭniny z udziełam inšaha pradstaŭnika «Našaj Nivy» — šef-redaktara Andreja Dyńko.
