Vadzim Dzieviatoŭski i Ivan Cichan. Ciapier miedali daviadziecca addać
Biełaruskija pryziory Alimpijady‑2008 u kidańni mołatu Vadzim Dzieviatoŭski i Ivan Cichan rašeńniem Mižnarodnaha alimpijskaha kamiteta pazbaŭlenyja svaich uznaharod, paviedamlaje Sport‑Ekspriess sa spasyłkaj na AR.
Dzieviatoŭski, što zaniaŭ 2‑ie miesca, pažyćciova adłučany ad sportu, bo heta ŭžo druhi vypadak u jaho karjery, kali spartoŭca zaśpieli na dopinhu.
Cichan pakarany dvuchhadovaj dyskvalifikacyjaj.
Dopinh‑sproby, što byli ŭziatyja pa skančeńni alimpijskich spabornictvaŭ u Piekinie, pakazali, što ŭ kryvi małatabojcaŭ značna pieravyšany ŭzrovień testasteronu (infarmacyja pra heta była abnarodavana 3 vieraśnia).
17 vieraśnia Cichan i Dzieviatoŭski, dajučy tłumačeńni, śpieckamisii, svaje viny nie pryznali.
Takim čynam, siarebranym pryzioram Hulniaŭ staŭ vienhr Kryściain Pars, bronza dastałasia Kodžy Murafusi ź Japonii.
«Heta kiepskaja navina, — zajaviŭ u kamientary BiełaPAN ministr sportu i turyzmu Alaksandr Hryharaŭ. — Nie viedaju, čamu pryniata takoje rašeńnie. Mnie ciažka ciapier štości kamientavać. Treba hladzieć materyjały i raicca ź jurystami, kab padrychtavać dakumienty dla abskardžańnia vierdyktu».
***
Takim čynam u biełarusaŭ ciapier na rachunku na Piekinskaj alimpijadzie nie 19, a 17 miedaloŭ: 4 zołata, 4 srebry, 9 bronzavych uznaharod (było 4+5+10).
Adpaviedna heta ŭžo najlepšy, jak ličyłasia try z pałovaj miesiacy, vynik. U Sidniei (2000) byli zavajavanyja taksama 17 miedaloŭ. Što praŭda, u Aŭstralii byli tolki try załatyja i try siarebranyja (3, 3, 11).
U ahulnym miedalnym zaliku naša kraina apusicłasia z 13-ha miesca na 15-je (pa usioj kolkaści zavajavanych uznaharod).
