Fota 2001 hodu. photo.bymedia.net
12 śniežnia aryštavany były prakuror Minskaj vobłaści Michaił Śniahir.Zrešty, viestka pra aryšt źjaviłasia tolki praz čatyry dni. Śniehiru pradjaŭlena abvinavačańnie pavodle artykułu 424 KK «Złoŭžyvańnie ŭładaj i słužbovymi paŭnamoctvami». Maksimalnyja sankcyi pavodle hetaha artykułu — 10 hadoŭ pazbaŭleńnia voli z kanfiskacyjaj majomaści.
Pavodle niekatoraj infarmacyi, u śledčym izalatary ŭ Śniehira adrazu zdaryŭsia sardečny prystup, tamu jaho pad achovaj milicyjantaŭ pieraviali ŭ balnicu.
Sprava Śniehira ŭspłyła 13 listapada na naradzie ŭ Łukašenki pa baraćbie z karupcyjaj. Kiraŭnik dziaržavy skazaŭ, što ŭ mai 2007 hodu Śniahir nabyŭ pa zanižanaj canie ŭ adnaho kamiersanta 5-pakajovuju kvateru ŭ centry Minska ahulnaj płoščaj za 200 kvadratnych mietraŭ. Kvatera była nabytaja za 156 miljonaŭ rubloŭ, ci to 72 tys. dalaraŭ, u toj čas jaje rynačny košt składaŭ kala 500 tysiač dalaraŭ.
Było zaznačana, što kvatera nabytaja z parušeńniem zakonu, bo Śniahir nabyŭ kvateru ŭ čałavieka, jaki nie mieŭ prava pradstaŭlać intaresy firmy-ŭłaśnika. A tym bolš u kvatery pražyvaŭ hramadzianin Sidarovič, u jakoha była arendnaja damova až da 2024 hodu. U svaju čarhu hazieta «Biełaruski partyzan» śćviardžaje, što kvatera Śniehirom kuplenaja absalutna zakonna. Pierad svaim druhim pryznačeńniem na pasadu prakurora Minskaj vobłaści Śniahir padavaŭ dakumienty na pravierku ŭ Radu Biaśpieki. I tady nijakich pretenzij nie było.
Źviartaje ŭvahu i toje, što pierad nabyćciom kvatery na vulicy Hrybajedava Śniahir pradaŭ niatannuju trochpakajoŭku ŭ Trajeckim pradmieści.
Što datyčyć Uładzimira Sidaroviča, to jon jašče ŭ 1999 h. zaklučyŭ z pradstaŭnictvam šviedskaj firmy Swe-Bel Partner AB, u jakoj pracavaŭ, pahadnieńnie ab arendzie kvatery na 25 hadoŭ. U 2007 hodzie Swe-Bel Partner AB faktyčna zbankrutavała i z radaściu pryniała prapanovu Śniehira ab prodažy kvatery.
Uładzimir Sidarovič paśla hetaha nieadnarazova źviartaŭsia ŭ Hienieralnuju prakuraturu, a taksama sud Centralnaha rajonu stalicy, ale jany ŭvieś čas zajmali pazicyju Śniehira. Pisaŭ listy Sidarovič taksama ŭ Administracyju prezidenta, KDK, Radu Biaśpieki, ale i jany abmiažoŭvalisia farmalnymi adpiskami. Tahačasny kiraŭniki Rady Biaśpieki Viktar Šejman prosta pieranakiroŭvaŭ spravu ŭ Hienprakuraturu.
Praź niejki čas sudździa Centralnaha rajonu Minska Alena Iljina, zahadzia pa telefonie ŭzhadniŭšy pazicyju sa Śniehirom, pryniała rašeńniem vysielić hramadzianina Sidaroviča z kvatery. Zrešty, namieraŭ zdavacca ŭ hetaj spravie Sidarovič nie mieŭ.
Na toj samaj naradzie Łukašenka kazaŭ, što Śniahir buduje jašče adzin dom la Cnianskaha vadaschovišča, jaki «vyhladaje bolš unušalna za rezidencyju prezidenta». Pa vizualnych adčuvańniach kiraŭnika krainy katedž kaštuje nie mieniej za miljon dalaraŭ. Zrešty,
padobnych asabniakoŭ na Cniancy i ŭ tych ža Drazdach navat nie dziesiatki, a sotni. A voś dla publičnaha pakazu vybrany byŭ mienavita śniehiroŭski.«Dzie prakuror uziaŭ hrošy?» — kryčaŭ Łukašenka.
Była dadzienaja kamanda ciaham dziesiaci dzion katedž kanfiskavać i pieradać jaho jakoj-niebudź «šmatdzietnaj siamji». Pa dakumientach asabniak aformleny nie na Śniehira, a nie niejkaha biźniesmiena, jaki daŭ pakazańni, što hrošy na domik jamu davaŭ prakuror. Kala budoŭli časta bačyli i svajakoŭ prakurora Minščyny.
Łukašenka dadaŭ i jašče adzin cikavy štrych da charaktarystyki Śniehira. Da prakurora źviartalisia siabry-pradprymalniki z prośbaj prybrać kankurenta i admianić rašeńnie Najvyšejšaha haspadarčaha sudu. Tady Śniahir prajaviŭ nadzvyčajnuju aktyŭnaść. U Najvyšejšym haspadarčym sudzie spravu vyrašyć nie vyjšła praz «pryncypovuju pazicyju» Śmirnova (były namieśnik staršyni Najvyšejšaha haspadarčaha sudu). Ale tut na dapamohu znoŭ pryjšoŭ druhi abvinavačany ŭ karupcyjnym skandale — namieśnik hienieralnaha prakurora Kupryjanaŭ.
Čamu achviaraj antykarupcyjnaha skandału staŭ mienavita Śniahir? Jon ničym nie lepšy i nie horšy za mnohich inšych prakurorskich rabotnikaŭ.Mahčyma, što Śniahir prosta nie z tym źviazaŭsia. Bo kažuć, Sidarovič ciesna źviazany z KDB, dzie zachavaŭ dobryja suviazi. Dakład Łukašenku rychtavała mienavita viedamstva Zajcava z dapamohaj kamitetu dziaržkantrolu.
Nie vyklučana, što svaich katedžaŭ Śniahir moh pazbycca i praz asabisty kanflikt ź Zianonam Łomaciem. Zacikaŭleny ŭ pieraraźmierkavańni rolaŭ u prakuratury i novy kiraŭnik Administracyi prezidenta Uładzimir Makiej. Śniahir byŭ usio ž pradstaŭnikom staroj hvardyi. Havorać, što i siońnia jon zachoŭvaje dobryja stasunki z byłym hienieralnym prakuroram Aleham Bažełkam.
Zrešty, chmary nad prakuroram źbiralisia jašče raniej. Roŭna hod tamu byŭ zvolnieny prakuror Minskaha rajonu Ihar Škatuła. Pryčyna — masavy zachop blizu stalicy ziamielnych nadziełaŭ i niezakonny prodaž ziamli dla budaŭnictva katedžaŭ. Tady ŭpieršyniu ŭ ŚMI trapiła infarmacyja pra katedžyk Śniehira. Kazali, što jon moža pazbycca pasady, ale tady kantrakt ź im padoŭžyli.
Jašče adzin niemałavažny fakt:
u 2000 hodzie pastanovu ab aryšcie Dźmitryja Paŭličenki padpisaŭ mienavita namieśnik hienieralnaha prakurora Michaił Śniahir.Heta značyć, akurat jon vałodaje šmat jakoj infarmacyjaj pa spravach źniknieńniaŭ viadomych praciŭnikaŭ Alaksandra Łukašenki.
Jasna adno: za karupcyjnymi pravałami ŭ samym sercy viertykali prahladajucca daŭnija i ciomnyja splacieńni intaresaŭ.
* * *
Michaił Śniahir naradziŭsia 5 listapada 1954. Skončyŭ jurydyčny fakultet BDU. Prajšoŭ šlach ad pamočnika prakurora Zavodskaha rajonu Minsku da namieśnika Hienieralnaha prakurora. Byŭ deputatam pałaty pradstaŭnikoŭ pieršaha sklikańnia. H.zn. padtrymaŭ Łukašenku ŭ časie pieravarotu 1996 hodu.
abo Jak nabyvajuć nieruchomaść mocnyja ludzi Respubliki Biełaruś
