12 studzienia Sojm BNF na svaim pasiadžeńni pryniaŭ zajavu z nahody 25-hodździa Kanstytucyi Respubliki Biełaruś, što budzie adznačacca 15 sakavika.
U zajavie ŭtrymlivajecca zvarot da ŭładaŭ ab zachadach pa adznačeńni jubilejnaj daty, jakaja musić stać nahodaj dla paćviardžeńnia niezaležnaści i suverenitetu sučasnaj biełaruskaj dziaržavy, adznačaje pres-słužba Partyi BNF.»
Na 2019 hod prypadaje jubilejnaja data, nadzvyčaj značnaja dla palityčnaj historyi sučasnaj Biełarusi: 15 sakavika ŭ našaj krainie budzie adznačacca dziaržaŭnaje śviata — Dzień Kanstytucyi, jakaja była pryniataja 25 hadoŭ tamu ŭ sakaviku 1994 hodu. Jubilej Kanstytucyi musić być hodna adznačany na dziaržaŭnym uzroŭni.
Čverć stahodździa Kanstytucyi niezaležnaj Respubliki Biełaruś — dobraja nahoda pakazać usiamu śvietu nieparušnaść suverenitetu Respubliki Biełaruś jak formy realizacyi nieadjemnaha prava biełaruskaha naroda na samavyznačeńnie, havorycca ŭ zajavie.
Śćviardžeńnie Kanstytucyi Respubliki Biełaruś jak ideałahičnaj asnovy biełaruskaha hramadztva pavinnaje pakłaści kaniec zamacham na biełaruskuju dziaržaŭnaść, jakija robiacca čaściakom pad falšyvymi lozunhami pra intehracyju na asnovie palityčnych śpiekulacyjaŭ z naŭprostavymi antybiełaruskimi metami.
Adznačeńnie hadaviny abviaščeńnia Kanstytucyi Respubliki Biełaruś i aktualizacyja zakładzienych u joj pryncypaŭ dziaržaŭnaha suverenitetu Biełarusi asabliva važnyja ciapier, kali suprać našaj krainy ažyćciaŭlajucca infarmacyjnyja ataki, skiravanyja na pazbaŭleńnie biełaruskaha naroda prava na samavyznačeńnie i pabudovu ŭłasnaj nacyjanalnaj dziaržavy.
Dośvied adznačeńnia letaś stahodździa Biełaruskaj Narodnaj Respubliki śviedčyć, što padobnyja važnyja histaryčnyja daty mohuć spryjać umacavańniu biełaruskaj dziaržaŭnaści, a ich ihnaravańnie dziaržaŭnymi orhanami moža nieści pahrozu dla jaje.
