Žurnalisty ź Nižniaha Noŭharada vykłali na Jutub videasiužet, pryśviečany pradaŭcam masažnych nakidak i pyłasosaŭ. Jany prapanujuć takija pryłady z nacenkaj u 10 razoŭ, a davierlivych zamańvajuć źnižkami i ilhotnymi kredytami.
Historyja nie novaja. Ale cikava, što na hety raz jak adzin z pradaŭcoŭ adkryta pryznaŭ, što źjaŭlajecca hramadzianinam Biełarusi.
Pradaviec Maksim paviedamiŭ, što źjaŭlajecca hramadzianinam Biełarusi.
Padobnyja «biznesoŭcy» ŭvieś čas katajucca pa ŭsioj terytoryi SND. Pradajuć roznaje: posud, koŭdry, pyłasosy… Piersanažy ź videarolika, naprykład, prapanujuć masažnyja nakidki na kresły. Pracedura standartnaja: zdymajecca restaran ci kanfierenc-zała, dzie i pravodzicca «prezientacyja», na jakoj havarki mieniedžar raśpisvaje cudy svajho tavaru. Miascovych žycharoŭ zaprašajuć ci abzvońvajučy pa telefonach, ci dasyłajučy pryhožyja kalarovyja zaprašalniki.
Pradaŭcy jeździać z takimi hastrolami pa ŭsich haradach, nie abychodziačy ŭvahaj i zusim maleńkija. U videasiužecie, naprykład, hutarka idzie ŭvohule pra siało pad Nižnim Noŭharadam, jakoje nazyvajecca Pačynki.
Admietna taksama, što niekatoryja naviedniki «prezientacyi» zahadzia viedali, što mierapryjemstva, miakka kažučy, sumnieŭnaje. Ale ŭsio adno vyjšli adtul z padpisanaj damovaj.
Prytym što tak zvanyja «masažnyja kresły», jakija pradajuć «hastralory» — heta navat nie kresły, a prosta nakidki. Kaštujuć jany vielmi šmat: «sa źnižkaj» ich možna nabyć na prezientacyi za 118 tysiač rasijskich rubloŭ, heta $1700!
Zrazumieła, što žychar rasijskaj pravincyi takuju raskošu dazvolić sabie nie moža. Tady jaho ŭhavorvajuć uziać kredyt. Pry afarmleńni kredytu košt hetaj masažnaj nakidki pavialičvajecca na tracinu — da $2,5 tysiačy za anučku ź vibramatoram. Prytym, što nabyć jaje samastojna možna ŭ 12 razoŭ tańniej.
