Praciahvajucca razborki ŭnutry kalektyva «Biełhaziety». Na hety raz pres-kanfierencyju davaŭ hałoŭny redaktar vydańnia Ihar Vysocki, a taksama praabaronca Andrej Bandarenka, jakoha niekatoryja nazyvajuć dyrektaram «Biełhaziety».
Juryj Karetnikaŭ i Kirył Žyvałovič. Fota Paŭluka Bykoŭskaha z facebook.com.
U svajoj pramovie Ihar Vysocki niamała miesca advioŭ asobie ŭłaśnika vydańnia Kiryła Žyvałoviča. Maŭlaŭ, pra toje, što ŭ Vysockaha buduć prablemy z Žyvałovičam, kazaŭ jašče były hałoŭny redaktar «Sovietskoj Biełoruśsii» Pavieł Jakubovič. «Z «SB» Žyvałoviča zvolnili za nieprystojnyja pavodziny», — skazaŭ Vysocki.
Potym jon apavioŭ pra dźvie kryminalnyja spravy, jakija byli ŭ minułym zaviedzienyja suprać Žyvałoviča. «Jon pabiŭ dziadoŭ-vochraŭcaŭ, achoŭnikaŭ Hałoŭpaštamtu. Adnaho pa hałavie, druhoha — pa śpinie, treciamu — furažku na vočy naciahnuŭ. Ja prasiŭ tych dziadoŭ, kab abvinavačańnie adklikali. Ale byŭ sud, i Kiryłu dali niekalki hadoŭ umoŭna», — raskazaŭ Vysocki.
«Potym mnie znoŭ telefanujuć: Žyvałovič u milicyi. Akazałasia, što jon u biljardnaj kahości kijem pabiŭ. Byŭ sud, prasili 7 hadoŭ źniavoleńnia. Ale Žyvałoviča nakiravali na ekśpiertyzu ŭ Navinki niejkim dziŭnym čynam, tak jon paźbieh pakarańnia».
Sam Kirył Žyvałovič nie admaŭlaje hetych vypadkaŭ. Kaža, što bojka na pošcie adbyłasia, kali jon znachodziŭsia tam pa redakcyjnym zadańni «Biełhaziety».
«Rašeńnie nakiravać na ekśpiertyzu pryniaŭ sud», — kaža jon pra druhuju spravu.
«Ja nie śviaciejšy za Papu Rymskaha — heta dakładna. Ale žančyn nahami dakładna nie biŭ. [Andrej Bandarenka byŭ prysudžany da 3 hadoŭ za toje, što źbiŭ susiedak — Red.] Ja b moh skazać, što suprać Vysockaha taksama viadziecca kryminalnaja vytvorčaść, ale nie budu hetaha rabić. Ja nie prychilnik takich mietadaŭ», — zapeŭniŭ Kirył Žyvałovič.
Kiryłu Žyvałoviču naležyć 75% statutnaha fonda «Biełhaziety». Na minułym tydni jon pryznačyŭ novym dyrektaram vydańnia byłoha lidara «Pravaha aljansa» Jurasia Karetnikava. Alternatyŭnym dyrektaram ličyć siabie pravaabaronca Andrej Bandarenka.
