Andrej Purhin u Minsku ŭ vieraśni 2014 h., fota Tut.by
Ministerstva ŭnutranych spraŭ t.zv. Danieckaj narodnaj respubliki (DNR) admoviłasia vydavać hramadzianstva «respubliki» byłomu śpikieru «Narodnaha savieta» (parłamienta) DNR Andreju Purhinu. Pra heta sam Purhin paviedamiŭ na svajoj staroncy va «Ukantakcie».
«Voś i skončyłasia maja epapieja z pašpartam. Mnie admovili ŭ pravie na žyćcio, bazavym pravie čałavieka. Prosta i budzionna ja pazbaŭleny ŭsich dakumientaŭ», — paviedamiŭ Purhin, dadaŭšy, što ŭ anałahičnaj situacyi apynułasia jaho žonka.
Da svajho dopisa Purhin prykłaŭ fatahrafiju dakumienta, vydadzienaha jamu Varašyłaŭskim rajonnym adździełam Danieckaha haradskoha ŭpraŭleńnia MUS «respubliki», dzie havorycca, što zajava Purhina ab vydačy jamu pašparta była adchilena (kankretnyja pryčyny admovy ŭkazany nie byli).
U 2014 hodzie Purhin byŭ adnym ź lidaraŭ tak zvanaj «ruskaj viasny» ŭ Danieckaj vobłaści i braŭ udzieł u stvareńni «Danieckaj narodnaj respubliki». Z maja pa listapad 2014 hoda jon byŭ pieršym namieśnikam staršyni «Savieta ministraŭ», a ź listapada 2014 ha pa vierasień 2015 hoda byŭ śpikieram parłamienta DNR.
