11 studzienia na składzie hatovaj pradukcyi zabojnaha cecha RUP «Biełarusnafta-Asobina» praviali invientaryzacyju i vyjavili prapažu 17 ton miasa ptuški — na sumu amal 57 tysiač rubloŭ. Rabotniki kažuć, što spačatku niastaču chacieli paviesić na ich, ale zaraz abiacajuć pravieści rasśledavańnie.
— Načalnik składa prynios śpis, nasuprać kožnaha proźvišča — suma, jakuju treba zapłacić. Niekatoryja padpisvali i zhadžalisia, — raspaviadaje pracaŭnica pradpryjemstva Lidzija. — A ŭčora nas sabraŭ hienieralny i skazaŭ, što jon usio sam pravieryć. Budziem hladzieć, što budzie dalej.
Pavodle słoŭ rabotnikaŭ pradpryjemstva, havorka idzie pra sumy ad 700 da 1000 rubloŭ kampiensacyi z čałavieka.
Pravaabaronca Leanid Sudalenka raspavioŭ, što da jaho źviarnulisia 7 pracaŭnikoŭ pradpryjemstva.
— Ludzi pryjšli i raskazali, što dva miesiacy tamu ŭsio było dobra, a 11 studzienia najmalnik pravioŭ invientaryzacyju i vyjavili hetuju niastaču. Padzialili na ŭsich materyjalna adkaznych, a heta 59 čałaviek, i tut ža ich pačali patrabavać: maŭlaŭ, płacicie dobraachvotna, a inakš zvolnim.
Sudalenka ličyć, što patrabavańnie najmalnika niezakonna.
Jon dapamoh tym, chto źviarnuŭsia, padrychtavać zajavu ŭ kamisiju pa pracoŭnych sprečkach z patrabavańniem, kab pretenzii z rabotnikaŭ źniali. «Kali nie, to my pojdziem u sud i budziem dakazvać adsutnaść viny kožnaha taho, chto źviarnuŭsia da nas», — kaža juryst.
U pres-słužbie PA «Biełarusnafta», daččynym pradpryjemstvam jakoha źjaŭlajecca ptuškafabryka, raspaviali, što nijakich zahadaŭ ab pryciahnieńni rabotnikaŭ da materyjalnaj adkaznaści pakul što nie vydavałasia.
