Ministerstva zamiežnych spraŭ Biełarusi nakiravała aficyjnaje zaprašeńnie kiraŭnictvu BDIPČ ABSIE naviedać krainu dla dyjałohu pa ŭdaskanaleńni biełaruskaha vybarčaha zakanadaŭstva i pravaprymianialnaj praktyki.Pra heta havorycca ŭ paviedamleńni pres‑sakratara MZS Andreja Papova, u jakim jon kamientuje ŭzajemadziejańnie Biełarusi z BDIPČ ABSIE pa vybarčaj prablematycy.
«Tak, my zajavili pra hatoŭnaść vieści dyjałoh z BDIPČ ABSIE pa ŭdaskanaleńni biełaruskaha vybarčaha zakanadaŭstva i pravaprymianialnaj praktyki. BDIPČ, sa svajho boku, stanoŭča adreahavała na našu prapanovu ab praviadzieńni kansultacyj ź biełaruskim bokam i vykazała namier ažyćciavić vizit u Biełaruś na ŭzroŭni kiraŭnictva biuro», — paviedamiŭ A.Papoŭ.
Jon prainfarmavaŭ, što ciapier vynikovaja spravazdača misii BDIPČ pa nazirańni za parłamienckimi vybarami «analizujecca kampietentnymi dziaržaŭnymi ŭstanovami Biełarusi». Kaardynacyja hetaj pracy, pavodle słoŭ pres‑sakratara, uskładziena na Nacyjanalny centr zakanadaŭstva i pravavych daśledavańniaŭ.
A.Papoŭ paviedamiŭ, što
ŭ studzieni 2009 hoda ŭ Minsku adbuducca kansultacyi «adnosna źmiestu vynikovaj spravazdačyi vyznačeńnia dalejšych madalnaściaŭ uzajemadziejańnia biełaruskaha boku i BDIPČ ABSIE pa dadzienym pytańni».
Nahadajem, u vynikovym dakładzie BDIPČ havorycca, što, niahledziačy na «niekatoryja palapšeńni», vybary ŭ Biełarusi nie adpaviadali standartam ABSIE.
U pryvatnaści, vybarčaje zakanadaŭstva nie daje mahčymaści dla «sapraŭdnaj palityčnaj kankurencyi i roŭnych adnosinaŭ da kandydataŭ z boku ŭładaŭ» i «pieraškadžaje praviadzieńniu vybaraŭ» u adpaviednaści z demakratyčnymi standartami. Ekśpierty zaznačajuć, što Vybarčy kodeks Biełarusi «nie zabiaśpiečvaje prazrystaha miechanizmu zachavanaści skryniaŭ ź biuleteniami paśla pačatku daterminovaha hałasavańnia, a taksama miechanizmu abarony samoha biuletenia».
Bolšaści apazicyjnych kandydataŭ było admoŭlena ŭ rehistracyi «z‑za niaznačnych parušeńniaŭ farmalnych patrabavańniaŭ», padkreślivajecca ŭ dakładzie. Aprača taho, abmiežavańni z boku dziaržorhanaŭ u metach stvareńnia farmalnaj roŭnaści pamiž usimi kandydatami pryviali da «minimumu miescaŭ dla sustreč, finansavańnia kampanii i dostupu da ŚMI». Na dumku ekśpiertaŭ misii, usio heta «stvaraje mahčymaści dla falsifikacyj».
