Dziorzkaje złačynstva było ździejśniena na płoščy Lenina kala Pastaŭskaha rajvykankama, dzie supracoŭnica ŭstanovy pryparkavała svoj Citroen. Praź niekatory čas jana vyjaviła, što aŭto sa stajanki źnikła, i paviedamiła pra heta ŭ dziažurnuju častku milicyi. Pastaŭskim apieratyŭnikam chapiła mienš za hadzinu, kab znajści zhonščyka i viarnuć aŭto uładalnicy, paviedamlaje sb.by.
Načalnik adździaleńnia kryminalnaha vyšuku Pastaŭskaha RAUS major milicyi Dźmitryj Šyman padzialiŭsia padrabiaznaściami:
- Złamyśnik skarystaŭsia tym, što paciarpiełaja niaščylna začyniła dźviery aŭtamabila, pakinuŭšy ŭ im kluč zapalvańnia i dakumienty na transpart. Haspadynia pryznałasia, što pastupała tak nie adnojčy, ale nie mierkavała, čym moža abiarnucca takaja biesturbotnaść. My apaviaścili ŭsie ŭbory i abjavili płan «Pierachop». Śledča apieratyŭnaja hrupa źniała zapisy videanazirańnia ź miesca zdareńnia. Mašynu ŭ horadzie vyjaviŭ načalnik RAUS pałkoŭnik milicyi Alaksandr Harus na płoščy Kamsamolskaj kala kramy «Kupalinka». Naš supracoŭnik Jaŭhien Kuryłovič zatrymaŭ u joj žychara rajcentra, jaki i akazaŭsia hałoŭnym padazravanym. Vyśvietlili, što mienavita jon skarystaŭsia biesturbotnaściu ŭładalnicy Citroen. Na skradzienym aŭto pryjechaŭ da svajho nieadnarazova sudzimaha tavaryša, jaki zamianiŭ jaho za rulom i razam jany adpravilisia ŭ kramu. Tavaryša padazravanaha taksama zatrymali, kab vyznačyć jaho dačynieńnie da złačynstva. Mužčyny abodva znachodzilisia ŭ stanie ałkaholnaha apjanieńnia.
Pa fakcie zhonu ŭzbudžanaja kryminalnaja sprava suprać baćki čaćviarych dziaciej, jaki pracuje budaŭnikom. Sankcyi pa artykule 214 častcy 1 KK RB praduhledžvajuć u tym liku abmiežavańnie voli da piaci hadoŭ, abo jaje pazbaŭleńnie na toj ža termin. Raniej padazravany mieŭ prablemy z zakonam: byŭ sudzimy za rabavańnie, ale ŭsie sudzimaści pahašany.
