Były namieśnik staršyni Minharvykankama i doktar sa šmathadovym dośviedam Ihar Jurkievič uznačaliŭ 6-ju haradskuju kliničnuju balnicu stalicy. Pra heta Tut.by paviedamili niekalki krynic.
15 studzienia Ihar Jurkievič pakinuŭ pasadu namieśnika staršyni Minharvykankama, na jakoj jon kuryravaŭ ideałohiju, sacyjałku i achovu zdaroŭja. U liku inšaha vialikuju ŭvahu jon nadavaŭ raźvićciu viełaruchu, asabista sustrakaŭsia z aktyvistami Minskaha viełasipiednaha tavarystva.
Ale, jak kažuć surazmoŭcy partała, najbolš blizkim dla jaho zaŭsiody zastavałasia achova zdaroŭja. Jurkievič aktyŭna prasoŭvaŭ raźvićcio elektronnaj achovy zdaroŭja ŭ stalicy, pry im prajšła hłabalnaja madernizacyja dziciačaj infiekcyjnaj balnicy i inšyja źmieny.
— Jon zaŭsiody mientalna zastavaŭsia doktaram, niezaležna ad pasady, — tłumačyć adzin sa znajomych Jurkieviča ź miedycynskaj śfiery i dadaje, što siońnia jon uznačaliŭ 6-ju haradskuju kliničnuju balnicu Minska.
«Šaściorka» pracuje na vulicy Uralskaj z 1964 hoda. Źjaŭlajecca šmatprofilnaj ustanovaj, jakija śpiecyjalizujucca na akazańni traŭmatałahičnaj i terapieŭtyčnaj dapamohi. Maje ŭ svajoj struktury centr transfuzijałohii i radzilny dom. Darečy, mienavita tut naradziłasia dačka Darji Domračavaj.
Ihar Jurkievič. 42 hady. Naradziŭsia ŭ siamji miedykaŭ u Stolinie Bresckaj vobłaści. Skončyŭ z čyrvonym dypłomam Hrodzienski mieduniviersitet i prajšoŭ pierapadrychtoŭku ŭ MDŁU. Pracavaŭ doktaram u Stolinie, doktaram pryjomnaha adździaleńnia ŭ Minskaj infiekcyjnaj balnicy, namieśnikam hałoŭnaha doktara hetaj ustanovy, hałoŭnym doktaram Dziciačaj infiekcyjnaj balnicy, namieśnikam staršyni kamiteta pa achovie zdaroŭja Minharvykankama i kiraŭnikom hetaha kamiteta. Z sakavika 2017 hoda pa studzień 2019 hodu — namieśnik staršyni Minharvykankama.
