Sioleta ŭłady znajšli bolš dziejsnuju mieru baraćby suprać ŚMI, čym prypynieńnie vychadu na try miesiacy. Presu biez pryčyny admaŭlajucca drukavać, vykidvajuć z padpisnych katalohaŭ i hazetnych šapikaŭ. Paciarpieli 17 vydańniaŭ, u tym liku «NN», «Narodnaja vola», «Rehijanalnaja hazieta», «Salidarnaść» (apošniaja zmušana prypyniła isnavańnie).
Reparter musić praryvacca da epicentru važnych padziej, bo luby čynoŭnik moža admović u akredytacyi dy nie puścić navat u zalu pasiedžańniaŭ, sud ci na zavod. 25 takich vypadkaŭ zafiksavana za 2005 hod u Miensku, Pinsku, Hancavičach, Homieli, Smurhoniach, Horadni, Baranavičach.
Choć svaboda słova harantujecca kanstytucyjaj, niezaležnyja ŚMI razhladajucca jak padryŭnyja. Žurnalistaŭ zatrymlivajuć. Polskich žurnalistaŭ u lipieni zatrymali za toje, što jany aśviatlali padziei vakoł Sajuzu palakaŭ. Zatrymali, bo «kiepska byli bačnyja piačatki na paśviedčańniach». Pakul repartery znachodzilisia ŭ RUUS, ich videazapisy vyniščyli. Juliju Daraškievič, fatakora «NN», u sakaviku haradzienskija amonaŭcy hvałtoŭna vydalili ź miesca praviadzieńnia akcyi pratestu pradprymalnikaŭ.
Za apublikavany materyjał žurnalistam pahražaje kryminalnaja sprava ab paklopie, jak zdaryłasia letaś u dačynieńni da redaktara «Borisovskich novostiej» Anatola Bukasa, albo źbićcio, jak žurnalistam Alesiem Abramovičam.
Tym časam raśśledavańni pa spravie źnikłych i zabitych žurnalistaŭ topčucca na miescy. Sprava ab zabojstvie Vieraniki Čarkasavaj prypyniena «ŭ suviazi ź niemažlivaściu ŭstanaŭleńnia asoby, jakaja padlahaje pryciahnieńniu da adkaznaści ŭ jakaści abvinavačanaha». Pa fakcie śmierci Vasila Hrodnikava prakuratura admoviłasia zavodzić kryminalnuju spravu. Zavadzki tak i lažyć niedzie ŭ lesie.
Žurnalisty niezaležnych ŚMI ŭśviedamlajuć, što ich čakaje na doŭhaj dystancyi baraćby za svabodu. Tuju samuju, jakuju harantuje Kanstytucyja.
