president.gov.by
Choć lod u adnosinach ź Jeŭrapiejskim sajuzam jašče nie rastaŭ, Biełaruś paśpiachova naładžvaje dyjałoh ź Jeŭropaj. Pra heta Łukašenka zajaviŭ na naradzie z kiraŭnictvam urada i najvyšejšymi dziaržaŭnymi orhanami, paviedamlaje pres-słužba kiraŭnika dziaržavy.
— Rastuć inviestycyi, pavialičyłasia dadatnaje salda ŭ handli, raźvivajucca kantakty. Minuły hod staŭ rekordnym pa abjomie supracoŭnictva ź Jeŭrapiejskim inviestycyjnym bankam i Jeŭrapiejskim bankam rekanstrukcyi i raźvićcia.
Jon adznačyŭ, što napiaredadni padčas pieramovaŭ z kiraŭnictvam JEBRR byli dasiahnuty istotnyja damoŭlenaści pa kredytavańni: «I nie pad 9%. Pa najvažniejšych napramkach: rekanstrukcyi, madernizacyi, budaŭnictvie novych abjektaŭ u Biełarusi — vada, masty, darohi.
«Lod u adnosinach ź Jeŭrapiejskim sajuzam nie rastaŭ, — padkreśliŭ Łukašenka. — Brusel padoŭžyŭ dziejańnie chaj simvaličnych, ale ŭsio ž abmiežavalnych mier. Łyžka dziohciu ŭ bočcy miodu. Jany ž nie majuć nijakaha značeńnia praktyčna, akramia simvaličnaha. «Tarhujecca» z nami navat pa drobiaziach ES, uchilajecca ad razmovy ab novym bazavym pahadnieńni, da hetaha času niama dakładnych jurydyčnych ramak ŭzajemadziejańnia», - skazaŭ kiraŭnik krainy.
Jon adznačyŭ, što ES u hety ž čas maje takija pahadnieńni z Rasijaj i inšymi postsavieckimi krainami. «Darečy, Rasija vielmi prasunutaja ŭ adnosinach ź Jeŭrasajuzam, Amierykaj i NATA. I my ž za heta Rasiju nie paprakajem. My šukajem u hetych pahadnieńniach svaju karyść. My nie tarpiedujem, nie pieraškadžajem, spryjajem. Dumaju, sapraŭdy hetak i Rasija pavinna pastupać, padtrymlivajučy nas. Nie na słovach, a na spravie», — zajaviŭ Alaksandr Łukašenka.
Kiraŭnik dziaržavy ŭ cełym padkreśliŭ, što Biełaruś paśpiachova naładžvaje dyjałoh sa svaim druhim najbujniejšym partnioram — Jeŭrasajuzam.
president.gov.by
Pavodle słoŭ Alaksandra Łukašenki, «Uschodniaje partniorstva» nabyvaje prahmatyčny charaktar, u im źjaŭlajecca bolš cikavych dla Biełarusi prajektaŭ. «Heta supracoŭnictva na Zachadzie siońnia vyklikaje niejkuju alerhiju i časam isteryku ŭ našaha hałoŭnaha partniora - Rasijskaj Fiederacyi (u asobnych palitykaŭ). Pytajemsia, čaho vy isterycie? Našu pradukcyju na rynak nie puskajuć, nachlebnikami abzyvajuć, vyšturchvajuć, cisnuć, dzie tolki možna. Nam što, schavacca pad plintus i tam siadzieć?!» — zadaŭ rytaryčnaje pytańnie biełaruski kiraŭnik.
«Kali pierad nami zakryvajuć dźviery — adnyja, druhija, trecija, - my šukajem čaćviortyja. Dla taho, kab narmalna isnavała dziaržava. I navat pry hetym nichto nas nie moža papraknuć, što my nibyta kudyści paviarnulisia. Nam nikudy nie treba pavaročvacca. My ŭ takoj situacyi, što nam treba pastajanna krucić hałavoj, bo znachodzimsia ŭ epicentry padziej — u centry Jeŭropy, — skazaŭ kiraŭnik krainy. — I nam treba žyć, adkazvać za 10 młn čałaviek. Navošta nam šukać ščaście na krai śvietu, kali b byli narmalnyja ekanamičnyja stasunki z Rasiejaj, kali b my mahli (jak my žalezabietonna damovilisia ŭ Sajuznaj dziaržavie, u JEAES) svabodna handlavać, pieramiaščać tavary, mahli pieramiaščacca ludzi, atrymlivać pasłuhi, nas nie abražali? Navošta nam šukać niejkaje ščaście nieviadoma dzie?»
Što da ŭzajemadziejańnia ź ES, najbližejšymi zadačami Alaksandr Łukašenka nazvaŭ padpisańnie ź Jeŭrasajuzam pryjarytetaŭ partniorstva i pahadnieńniaŭ pa readmisii i spraščeńni vizavych pracedur. «Adnak jeŭrapiejcy pavinny razumieć, što lubyja čužyja našamu narodu idei i raźmieny na škodu nacyjanalnym intaresam dla nas absalutna nieprymalnyja», — reziumavaŭ Alaksandr Łukašenka.
