Śledčy kamitet ahučyŭ svaju viersiju padziej. Błohiera vinavaciać u tym, što jon prysabiečyŭ čužyja hrošy.
Alaksandr Kabanaŭ
Aficyjny pradstaŭnik SK pa Bresckaj vobłaści Dźmitryj Ivaniuk paviedamiŭ, što «žychar Biarozy ŭ 2017 hodzie ŭziaŭ u žycharoŭ svajho doma hrošy na rehistracyju tavarystva ŭłaśnikaŭ i vyrab prajektnaj dakumientacyi dla budaŭnictva padvalnych pamiaškańniaŭ». Suma była bolšaja za 400 rubloŭ.
«Pry hetym žychary doma dali tłumačeńni, što hetyja hrašovyja srodki byli pieradadzienyja mužčynu mienavita dla vyšejzhadanych metaŭ, a pra dalejšy ich los im ničoha nie viadoma», — udakładniŭ Ivaniuk.
Alaksandr Kabanaŭ nie admaŭlaje, što braŭ hrošy. Ale ŭdakładniaje: «Pa-pieršaje, ja chaču źviarnuć uvahu, što padziei byli dva hady tamu. A napisaŭ zajavu tolki ciapier supracoŭnik milicyi. Vystaviŭ pazoŭ 10 rubloŭ. Sutnaść zajavy ja nie viedaju jašče, — kaža Alaksandr Kabanaŭ. —
Z žycharoŭ doma ŭsie hetyja dva hady nichto nie mieŭ pretenzij. U maim domie žyvie 10 milicyjantaŭ i 1 supracoŭnik SK. I za dva hady pretenzij nichto ź ich nie mieŭ, nichto nie padyšoŭ, nie pacikaviŭsia, što tam z hrašyma.
Pa-druhoje. 440 rubloŭ — heta byŭ moj zarobak za 4 miesiacy pracy staršynioj tavarystva žycharoŭ.
Pra zbor hrošaj na padvalnyja pamiaškańni — heta chłuśnia. Bo pa 10 rubloŭ z kvatery prosta nie chopić.
Heta ŭsio adkrytaja pravakacyja i cisk uładaŭ na mianie, — kaža Kabanaŭ.
— Paśla zajavy pryjechała bryhada milicyi pracavać z Bresta, nie ź Biarozy. U mianie prajšoŭ vobšuk. Pierad ludźmi ja ni ŭ čym nie vinavaty. Liču, što ŭ sudzie budzie ŭsio tak, «jak treba». Jakuju kamandu daduć, taki vyrak mnie i abvieściać. Śledčamu ja adkryta kazaŭ, što nijakaha kryminału tut niama, niama navat administratyŭki niama ŭ majoj spravie».
Błohiery Siarhiej Piatruchin i Alaksandr Kabanaŭ letaś nie raz pryciahvalisia da administracyjnaj adkaznaści. Ich štrafavali za videaroliki dla kanała «Narodny reparcior», u jakich jany aśviatlajuć situacyju vakoł budaŭnictva pad Brestam akumulatarnaha zavoda «AjPauer».
