U dačynieńni radykalnaha paeta Słavamira Adamoviča zaviedzienaja kryminalnaja sprava za «kradziež, ździejśnieny z praniknieńniem u žyllo».
Sprava była zaviedzienaja ŭ śniežni 2018 hoda, apošnim časam jon znachodziŭsia pad chatnim aryštam.
Słavamir Adamovič, fota Radyjo Svaboda
U razmovie z karespandentam «Našaj Nivy» Adamovič nie staŭ raskazvać padrabiaznaści spravy, ale patłumačyŭ, što havorka viadziecca pra sumu kala 300 rubloŭ. Zajavu na jaho napisała inšaja fizičnaja asoba.
Adamovič źviazvaje pieraśled sa svajoj hramadskaj aktyŭnaściu.
Sud adbudziecca 22 sakavika ŭ Marjinaj Horcy. Adamoviču pahražajuć vypraŭlenčyja pracy na termin da dvuch hadoŭ, albo aryšt, albo abmiežavańnie svabody na termin da čatyroch hadoŭ, albo pazbaŭleńnie svabody na toj ža termin.
***
Słavamir Adamovič byŭ adnym z zasnavalnikam Tavarystva maładych litarataraŭ «Tutejšyja», zdabyŭ papularnaść u 1990-yja.
U 1995 hodzie napisaŭ vierš «Ubiej priezidienta!», za što byŭ aryštavany. U turmie KDB trymaŭ suchuju haładoŭku. Praz 10 miesiacaŭ vypuščany pad padpisku pra niavyjezd. Pakarańnie, da jakoha pryhavaryŭ Słavamira Adamoviča sud, faktyčna abmiažoŭvałasia tym terminam, jaki jon užo adbyŭ u źniavoleńni.
U 1997 hodzie na adnym z apazicyjnych mitynhaŭ publična zašyŭ sabie rot u znak pratestu suprać cisku ŭładaŭ na niezaležnyja ŚMI i niezaležnych žurnalistaŭ.
U pačatku 2000-ch emihravaŭ u Narviehiju, ale ŭ 2009 hodzie viarnuŭsia ŭ Biełaruś i pasialiŭsia ŭ Marjinaj Horcy.
