president.gov.by
Paradak u haradach pavinny padtrymlivać nie tolki kamunalnyja słužby, ale i sami žychary. Ab hetym Alaksandr Łukašenka zajaviŭ siońnia na sustrečy z aktyvam Baranavičaŭ i Baranavickaha rajona, piša BiełTA.
Alaksandr Łukašenka adznačyŭ, što pierad jaho pryjezdam Baranavičy pryviali ŭ paradak. Adzin z žycharoŭ navat vykazaŭsia ŭ srodkach masavaj infarmacyi za toje, kab prezident pryjazdžaŭ da ich jak maha čaściej, tady ŭ horadzie zaŭsiody budzie paradak.
«Horad pryviali ŭ paradak, niešta pafarbavali, adramantavali. Heta naturalna. U siłu asablivaściaŭ majho charaktaru ja nie pieranošu, kali niechta ŭ hości pryjazdžaje i ŭ chacie nie prybrana. Heta elemientarna. Tamu tyja, jakija pakutujuć i krytyčna staviacca, chaj nie pakutujuć. Jany taksama, kali hość pryjazdžaje, prybirajuć, padmiatajuć, — adznačyŭ Alaksandr Łukašenka. — A tyja, chto zaklikaje mianie pryjazdžać siudy choć by adzin raz u hod (tady tut naviaduć paradak), pamylajucca. Paśla majho pryjezdu vy sami budziecie navodzić paradak, budziecie ŭtrymlivać horad u takoj ža čyścini, jak ja ciapier bačyŭ, a vy bačycie ŭžo niekalki dzion».
«Horad u paradku, ale ja vielmi bajusia, što vy tracicie na heta lišnija hrošy. Ni ŭ jakim razie nielha tracić hrošy na heta — ludzi pavinny prybirać sami.
Tak, kali vulicu, asfalt padramantavać i inšaje — jaki čałaviek heta budzie rabić? Heta užo my, dziaržava, pavinny adkazvać, — padkreśliŭ jon. — Nam ludziej paprakać niama za što. Kali my arhanizujem, našy ludzi adklikajucca z zadavalnieńniem. Biełarusy — heta ŭsio ž taki akuratny narod. Jany hanaracca čyścinioj svajho horada, svajoj vioski, ale treba arhanizavać, treba paprasić ich. Treba ich pryciahnuć da hetaha».
