74‑hadovy niamiecki miljarder Adolf Merkle, uładalnik farmaceŭtyčnaha kancerna «Ratyjofarm», kinuŭsia pad ciahnik niepadalok ad svajho domu.U rejtynhu samych bahatych ludziej płaniety Forbes Merkle zajmaŭ 94‑ie miesca.
Merkle z asabistaj majomaściu pavodle roznych acenak ad 7 da 11 miljardaŭ jeŭra byŭ adnym z najbahaciejšych ludziej Niamieččyny. Aproč vytvorčaści miedykamientaŭ, Merkle vałodaŭ taksama kancernam, jaki vyrablaŭ budaŭničyja materyjały. Na jahonych pradpryjemstvach, ahulny košt jakich aceńvajecca ŭ 30 miljardaŭ jeŭra, pracuje 100 tysiač čałaviek.
Miljarder kinuŭsia pad ciahnik viečaram u paniadziełak i zahinuŭ imhnienna, ale paviedamleńnie pra jahonuju śmierć źjaviłasia tolki praz sutki.
Siamja, jakoj miljarder pakinuŭ raźvitalny list, nazyvaje pryčynaj samahubstva mahnata ciažki ekanamičny stan, u jakim apynuŭsia biznes Merkle ŭ vyniku suśvietnaha finansavaha kryzisu.
Pryčynaj ekanamičnych ciažkaściaŭ Merkle ekśpierty ličać niaŭdałyja apieracyi z akcyjami kancerna «Falksvahien». Zapazyčanaści biznesu Merkle aceńvajucca ekśpiertami ad 700 miljonaŭ da 1 miljarda eŭra.
Viadomyja palityki j biznesoŭcy Niamieččyny ŭžo vystupili z vysokimi acenkami žyćcia j dziejnaści Adolfa Merkle dy vykazali svaje spačuvańni jaho svajakam.
