Błohier Eduard Palčys, adzin z arhanizataraŭ Dnia Voli — 2019, apublikavaŭ u fejsbuku pretenzii da apazicyjnych palityčnych lidaraŭ.
Mianie prosiać choć by koratka napisać tekstam pra toje, što ja dźvie hadziny raspaviadaŭ na strymie (spasyłka na jaho budzie ŭ apisańni).
Tamu ŭ hetym doŭhim dopisie budzie dadzieny adkaz na 4 papularnyja pytańni: «Navošta vy źlili pratest?», «Čamu vy nie abjadnajeciesia?», «Kolki vy hrošaj zarabili?». Nu i «A što dalej rabić budziecie?»
Nie ŭsprymajcie jaho jak nakid abo vyśviatleńnie rachunkaŭ. Ja abiacaŭ usio raskazać paśla 25-ha sakavika, abiacańnie strymlivaju. Čytvo budzie doŭhim, paciarpicie, heta samy vialiki moj fejsbučny post u žyćci).
Pra źliŭ pratestu
Nielha źlić toje, čaho nie było i što nie rychtavałasia. U 2018 hodzie sam Statkievič paklikaŭ Paŭła Biełavusa ŭ arhkamitet, viedajučy, što my rychtavali śviatkavańnie. Biełavus pačaŭ ciahnuć mianie tudy (ja supraciŭlaŭsia doŭha). Nu a kali adekvatnaści stała zusim mała, ja amal siłaj prymusiŭ pryjści Antona Matolku.
Na hetych arhkamitetach (niekatoryja ja sam asabista strymiŭ) nie viałasia havorka pra pratesty, tolki ab śviatkavańni. Za scenar z maršam i śviatočnym kancertam na płoščy Svabody hałasavaŭ sam Statkievič i pradstaŭniki BNK.
Kali kazać pra 2019, my śpiecyjalna nie zajmali datu 25-ha sakavika, kab nas nie paprakali ŭ «manapolii i źlivach». Ale BNK i kandydat u prezidenty Statkievič ničoha za ceły hod nie prydumaŭ lepšaha, čym dałučycca da samaj našaj miakkaj inicyjatyvy decentralizavanaha płana — uskłaści kvietki na Vaładarskaha.
Čamu vy nie abjadnalisia?
Tut ceły bukiet pryčyn, adkazvać budziem paśladoŭna.
— Paśla padpisańnia zajaŭki na Opierny teatr karysnaja praca «palitykaŭ» Hubareviča, Labiedźki, Rymašeŭskaha i inšych na hetym zaviaršyłasia. Jany nie zrabili amal ničoha, što było b kaštoŭnym (u adroźnieńnie ad Partyi BNF). Navat adzinaja zadača, pra jakuju my ich prasili (zaprašeńnie cikavych śpikieraŭ ź ES i Ukrainy) akazałasia im nie pad siłu.
— Padčas padrychtoŭki BNR-100, kali ŭsia kamanda ŭ aŭralnym režymie pracavać što jość sił, u ich znachodzilisia siły na paddyvanovyja hulni i intryhi. Jany aktyŭna leźli pravić scenar, chto i kali vystupaje, chto i kamu kolki času i h.d. Asnoŭny zamut adbyŭsia vakoł pierson Kanapackaj i Anisim. Hubarevič publična kazaŭ, što nielha ich zaprašać vystupać, bo parłamient nielehitymny, vybary byli niesumlennyja i inšyja pafasnyja rečy.
Jakoje było ździŭleńnie, kali ŭ hetym hodzie što Kanapackaja, što Anisim vystupili ŭ Kijeŭskim skviery, i dla Hubareviča raptam stali lehitymnymi. A pryčyna šury-bury była, mabyć, tolki ŭ tym, što hod tamu Kanapackaja sčapiłasia ź Labiedźkam za AHP.
— Dobra b intryhi. Ale byli i momanty, jakija prosta adkryta škodzili spravie. Da prykładu, talent vieści pieramovy «palityka» Hubareviča. Kali była ahulnaja i napružanaja sustreča z kiraŭnictvam HUUS Minska ab BNR100, hety piersanaž umudryŭsia ŭstać pasiaredzinie sustrečy sa słovami: «U mianie efir na «Jeŭraradyjo» i syści. Na šlachu da Jeŭraradyjo jon jašče paśpieŭ dać kamientar Svabodzie, jaki skažaŭ sutnaść pieramovaŭ nakont dazvołu nacyjanalnaj simvoliki ŭ niehatyŭny bok.
I kali ŭžo da kanca sustrečy čynoŭniki MUS zazirnuli ŭ smartfony, jany padumali, što heta była zapłanavanaja pravakacyja, i ščyra nie razumieli, navošta my tak padajom infarmacyju pra pieramovy (jakija byli pa vyniku bolš pazityŭnymi, čym niehatyŭnymi). U vyniku Ryhor Kastusioŭ vymušany byŭ prasić prabačeńnia. U budučyni padobnaja situacyja zdaryłasia i va ŭzajemaadnosinach ź Minharvykankamam, dzie Kastusiovu taksama daviałosia prasić prabačeńnia za pavodziny Hubareviča.
— Da studzienia 2019 hoda palityki-pravacentrysty ni razu nie napisali i nie patelefanavali z nahody padrychtoŭki da Dnia Voli — 2019. Zatoje, jak nam stała viadoma, što jany, što Dźmitryjeŭ aktyŭna ŭvieś 2018 hod biehali pa ambasadach i fondach, śćviardžajučy, što BNR100 ich zasłuha.
Kali ž Rymašeŭski pračnuŭsia i staŭ telefanavać, to my zaŭvažyli, što jon sprabavaŭ spravakavać nas i BNF, kažučy roznuju chłuśniu. Daviedaŭšysia ad mianie, što my Banhałor ci Kijeŭski skvier nie razhladajem, jašče tady jon skazaŭ frazu: «Nu, lepš Banhałor ci Kijeŭski, čym ničoha». Z takim nastrojem tym bolš nam nie zachaciełasia «abjadnoŭvacca», bo my ŭ lubym vypadku vyrašyli pravieści ŭsio na hodnaj placoŭcy.
— Praz 12 dzion paśla našaj zajaŭki na «Dynama» pravacentrysty padali na Opierny teatr 25-ha sakavika. 28 sakavika, u efiry Jeŭraradyjo, Rymašeŭski zajaviŭ: «Jany robiać nie paralelna, a sumiesna», «Što błohiery bolš pra kancert i śviatkavańnie, a jany pra palityku i baraćbu za niezaležnaść», «Što ich mitynh — palityčny dadatak, ale nijak nie kankurencyja».
Jak ža było cikava daviedacca, što, akazvajecca, jany ŭpotaj padali zajaŭku i na 24 sakavika na Opierny teatr. Ale heta drobiazi, u paraŭnańni z nastupnym.
— Paśla publičnaha adkazu Łukašenki nakont «Dynama» (1 sakavika), my adrazu ž padali zajaŭki na 2 inšyja placoŭki — Pałac sportu i płošča Svabody. 7 sakavika ŭłady admovili pravacentrystam u zajaŭcy pa Opiernym teatry.
I pakul našy zajaŭki na Pałac sportu i płošču Svabody znachodzilisia na razhladzie, Rymašeŭski z kampanijaj nasieŭ na Biełavusa, telefanujučy jamu ledź nie kožny dzień. 14 sakavika jany telefanavali pa 10 razoŭ na dzień, sprabujučy damahčysia nie zrazumieła jakich adkazaŭ. Kali ja ŭziaŭ słuchaŭku, Rymašeŭski chutka psichanuŭ i ad biblejskich cytat chutka pierajšoŭ da błatnoha žarhonu.
Jany praciahnuli pazvońvać Biełavusu, i Paša, nie vytrymaŭšy, paprasiŭ: «Kali vy budziecie padavać na Kijeŭski skvier, to pakul nie padavajcie na 24-ha, bo nam jašče niama adkazu pa placoŭkach kala Pałaca sportu i płoščy Svabody».
Pačuŭšy heta ad Biełavusa, u hety ž dzień 14 sakavika pravacentrysty tajemna (nie paviedamiŭšy nam) padali zajaŭku na Kijeŭski skvier jakraz na 24 sakavika, što tolki i treba było ŭładam. Atrymaŭšy mahčymaść vybaru pamiž centralnymi płoščami i miescam a-la Banhałor, ułady padpisali nam zahad ab admovie ŭ placoŭkach kala Pałaca sportu i na płoščy Svabody na nastupny ž dzień (15 sakavika).
— Usia sutnaść dziejańniaŭ Rymašeŭskaha, Hubareviča, Barysava i inšych zaklučałasia nie ŭ stvareńni svajho mierapryjemstva, a ŭ sprobie pieraškodzić našaj pracy. Typovy prykład: daviedaŭšysia 18 sakavika, što ŭ Harodni dali narmalnaje miesca (Kałožski park), naša kamanda ŭžo praź niekalki hadzin abviaściła, što i jak my tam budziem rabić.
Pravacentrysty, padaŭšy zajaŭku ŭ paviedamlalnaj formie (heta značyć, nie patrebien dazvoł uładaŭ) na Kijeŭski skvier 14 sakavika, maŭčali pra heta da 19 sakavika, prafukaŭšy paprostu 5 z 10 dzion na padrychtoŭku. Zaraz Rymašeŭski i Hubarevič sprabujuć chłusić, što my ich paprasili maŭčać. Ale heta absalutnaja chłuśnia, tamu što my navat nie viedali, što jany padali na Kijeŭski skvier.
A na samaj spravie hetyja tavaryšy paprostu čakali, što budziem rabić my, zamiest taho, kab rychtavać svajo mierapryjemstva.
— I navat abviaściŭšy ab svaim mierapryjemstvie, zamiest dbajnaj padrychtoŭki hetyja ludzi zajmalisia bolšaj častkaj času kidańniem na nas. Vam dastatkova zajści ŭ kamientary maich pastoŭ, Biełavusa abo Matolki, kab ubačyć tam paŭsiul Rymašeŭskaha z adnastajnymi, napisanymi pad kapirku kamientarami.
Bačačy, što nas heta nie kranaje, jany stali nakidvać na temu hrošaj. Uličvajučy, što jany nam nie paviedamili pra svaje płany, my ŭžo 18 sakavika stali zakazvać scenu, huk i inšyja rečy dla Hrodna, i ŭ nas samich brakavała resursaŭ.
Bolš za toje, davać narodnyja hrošy takim piersanažam aznačała b pastupić paprostu biezadkazna, viedajučy, jak jany pracujuć. Dumaju, na hetym ja skončyŭ adkazvać na pytańnie: «Čamu vy nie abjadnalisia?».
Nakont «zarobku» i «nažyvy»
Zvyčajna toj, chto heta piša, vielmi słaba razumieje ŭ biznesie. Kali vy dumajecie, što varta marnavać paŭhoda svajho žyćcia na arhanizacyju takich mierapryjemstvaŭ, kab potym na vialikuju kamandu raśpilić 1—2 tysiačy dalaraŭ — u vas savok hałaŭnoha mozhu. Kali vy dumajecie, što prafiesijnaja scena, huk, transpart, hienieratary i inšaje ničoha nie kaštujuć — u vas savok hałaŭnoha mozhu.
Asabista skažu za siabie: za apošnija paŭhoda ja pierastaŭ vieści sajt 1863x, ja nie rablu, jak chacieŭ, šmat strymaŭ i videa. Pahladzieŭšy ŭčorašniuju spravazdaču, vy možacie zrazumieć, što ŭ vyniku arhanizatary akazalisia ŭ minusie. A kali vy pa-raniejšamu ličycie, što na hetym možna nažyvacca — kali łaska, rabicie padobnaje i bahaciejcie.
Što dalej?
Dakładna na hetaje pytańnie za ŭsiu kamandu adkazać nie mahu. Ahułam na BNR100 i na BNR101 my addali hod pracy, i ciapier usie adčuvajuć peŭnuju stomlenaść.
Mahu skazać, što ja ŭzradavaŭsia, kali Rymašeŭski zajaviŭ, što biare na siabie adkaznaść za BNR102. Taksama chaču skazać, što za čas padrychtoŭki bačyŭ sotni pastoŭ ad roznych ekśpiertaŭ, u tym liku i «davajcie na Banhałory 50 000 źbiarom». Chaču im skazać: viedajecie, jak lepš, biarycie i rabicie prosta ciapier. Vy možacie zaŭtra padać na Banhałor i viedać, što vam jaho daduć. U vas budzie cełych 360 dzion na padrychtoŭku, a nie 5, jak u nas u Hrodnie.
Tamu my budziem tolki rady, kali ŭsie ekśpierty i kamientatary sami pačnuć što-niebudź arhanizoŭvać na nastupny hod. U hetym i jość charastvo decentralizacyi, jakaja siabie vielmi dobra pakazała ŭ hetym hodzie.
Na hetym, spadziajusia, asabista dla mianie razbor palotaŭ pa Dni Voli budzie zakryty.
