president.gov.by
Leanid Zajac zojmie pasadu staršyni Mahiloŭskaha abłvykankama, a Michaił Rusy budzie nakiravany na pasadu pamočnika prezidenta — inśpiektaram pa Mahiloŭskaj vobłaści. Adpaviednyja rašeńni pryniatyja siońnia Alaksandram Łukašenkam pa vynikach sustrečy ź imi. Čakajecca, što hetyja rašeńni buduć farmalizavanyja ŭ najbližejšy čas, piša BiełTA.
Kiraŭnik dziaržavy rastłumačyŭ matyvy, pa jakich nazvanyja čynoŭniki niadaŭna byli vyzvalenyja ad pasad ministra sielskaj haspadarki i charčavańnia i vice-premjera.
Łukašenka nahadaŭ, što za ŭsio, što adbyvałasia ŭ krainie ŭ śfiery sielskaj haspadarki, jany nieśli piersanalnuju adkaznaść. «Pačynajučy ad maich kankretnych daručeńniaŭ pa peŭnych kulturach — lon, raps i inšaje — i da technałohij u sielskaj haspadarcy i ekspartu pradukcyi na inšyja rynki, — skazaŭ kiraŭnik krainy. — I ja paprasiŭ by vas jašče raz, kab vy nie dumali, što heta niejki ekspromt z-za niejkaj fiermy ŭ Śližach. Słuchajcie, tam jość kamu zajmacca fiermami, i jany pavinny byli hetym zajmacca. Jany ciapier i zajmajucca. Heta sprava pieradusim kiraŭnika haspadarki i staršyni rajvykankama».
«Tamu nie treba dumać pra toje, što biesparadak na fiermach i mašynnych dvarach u hetym «Kupałaŭskim» (ahrachołdynh u Škłoŭskim rajonie) pryvioŭ da adstaŭki adnaho i druhoha», — dadaŭ biełaruski kiraŭnik.
Łukašenka padkreśliŭ, što nieabchodna strohaje vykanańnie technałohij i žaleznaja dyscyplina: «Ja papiaredžvaŭ, asabliva vas, Leanid Kanstancinavič, ni z kim nie treba razmaŭlać. Usie vielmi šmat kažuć, ale mała robiać. Vy hety faktar nie ŭličyli i nie ŭličvali. Toje ž samaje tyčycca vice-premjera, jaki byŭ adkaznym za Mahiloŭskuju vobłaść».
Łukašenka zajaviŭ, što zaprasiŭ Michaiła Rusaha i Leanida Zajca, kab ahučyć pryniataje im rašeńnie. «Heta zahad: vy ŭdvaich jedziecie ŭ Mahiloŭskuju vobłaść, navodzicie tam žalezny paradak i paviedamlajecie mnie. Ja budu ŭ vas kožny miesiac u Mahiloŭskaj vobłaści. Čym zmahu, tym dapamahu. Ale pierš za ŭsio vy tam pasiejcie jak treba, pa technałohii. I na praciahu miesiaca, kali vam treba pieravieści Mahiloŭščynu na vajennaje stanovišča, jak ciapier u «Kupałaŭskim», pieravodźcie».
Samaje hałoŭnaje, što zapatrabavaŭ Alaksandr Łukašenka, — arhanizavać pracu ŭ sielskaj haspadarcy pa technałohii: «Prymuście, navučycie ich dziejničać pa technałohii. Nie moža Mahiloŭskaja vobłaść pleścisia ŭ chvaście z takimi hlebami, jakimi jana vałodaje. Heta vydatnyja ziemli».
«Vy jak hramadzianie Biełarusi moj zahad pavinny vykanać. Vykarystoŭvajcie lubyja zakonnyja mietady, luby zakonny srodak, kab tam navieści paradak i dakazać, što vy technałahičnyja i sapraŭdnyja mužyki», — reziumavaŭ kiraŭnik dziaržavy.
