Repartaž z kaladnaha kancertu Źmitra Vajciuškieviča.
(fota-Aleś Bondar)
(fota-Aleś Bondar)
I nie pytajcie mianie, chto taki Ziuzia. Ja jašče nie ačuniaŭ ad balučaha faktu, što Dzieda Maroza niama, a jość Śviaty Mikałaj. I voś hety Ziuzia, značycca, ŭciełaviŭsia ŭčora ŭ Minsku. Jak zavakonny śnieh na hałavu. Chacia buduć takija, jakija śćvierdziać, što na kancercie ŭ «Kazie» (jaje małoj zali) ź biełym hrymam vakoł vačej i pafarbavanym čyrvonym nosam byŭ nichto inšy, jak Źmicier Vajciuškievič, jaki ŭdała vydavaŭ siabie za zimniaje bostva. Što heta mienavita jon cynična skarystaŭsia tym, što nichto dakładna nia viedaje, jak vyhladajuć typovyja biełaruskija bostvy.
Prapiajaŭšy supolna z załaj, Źmicieraziuzia prypuściŭ dalej. Padzialaŭ i ŭładaryŭ. Spačatku załožna śpiavaŭ z baćkami. I pračuła — ź dzietkami. Paddobryvaŭ apošnich čaradoj pieśniaŭ pra aniołkaŭ (novy cykł na vieršy Arcioma Kavaleŭskaha), i dzietki, by aniołki z samich pieśniaŭ, vadzili karahod pierad scenaj.
Zakałychvaŭ, zalulvaŭ žanočuju pałavinu. I ŭ mužčynskim častcy zapanavała vyraznaja ciša, kali žanočyja hałasy suładna zaciahnuli słovy Vajciuškievičava (Ziuzievaha?) šlahiera: «Pryjdzi, moj kachany!». Mužčyny sturbavana abdumvali, na kaho ŭ čas Kaladaŭ varažyli ich pałoŭki, padazrajučy, što nie na ich samich.
Było ciopła i ŭsio — darečy. My, sučasnyja, dakładna nia viedajem, ale, peŭna, tak i pavinna być, kali za vaknom vialiki-vialiki minus, ludziam chočacca pahrecca, a ŭ chatu niespadzioŭki prašyŭsia Ziuzia.
Jak možna svajo nie lubić? Svajo žyvoje zimovaje bostva, jakoje choča tabie spadabacca i pasłuchmiana pieratvarajecca na tvajo ŭzvažańnie ŭ žanočaje, mužčynskaje ci dziciačaje. Kali jano poruč, pablizu, a nie pryvałakłosia siudy z Łapłandskaj impieryi, kab paadkryvaŭšy rot «pad fanieru», banalna zrubić babła. Učora źviačora ludzi stali pryvykać da svajho. I nie pytajcie mianie, chto taki Ziuzia.
Pavał Kaściukievič
P.S. Prapanova: u suviazi z zaciažnymi śviatami pierajmienavać hramadskuju inicyjatyvu «Budźma!» u «Nu, budźma!»
Na videa - premjera pieśni pra anioła:
Dziciačy chor:
Muzyčnaje papury:
Źmicier Vajciuškievič pra hazavy kryzis i pra biełaruskaść:
