Hazavaja vajna prymusiła jeŭrapiejcaŭ ad słovaŭ pra nieabchodnaść pošuku alternatyŭnych krynicaŭ enierhii pierajści da kankretnych dziejańniaŭ.
Spynieńnie pastavak rasijskaha hazu ŭ Jeŭropu, jakim Maskva źbirałasia pakarać niezhavorlivy Kijeŭ, moža bumieranham udaryć pa intaresach «Hazpromu», piša Kommiersant' . Jeŭropa, jakaja bolš za inšych paciarpieła ad hazavaha, prademanstravała zdolnaść znachodzić vyjście z kryzisu za košt alternatyŭnych krynicaŭ i pastaŭščykoŭ enierhii. Užo ciapier možna kazać, padsumoŭvaje vydańnie, što rasijska-ŭkrainski kanflikt dapamoh Jeŭrasajuzu mabilizavacca na pošuk šlachoŭ vybaŭleńnia ad rasijskaj hazavaj apieki.
Pakul u Bruseli ministry enierhietyki razvažajuć pra doŭhaterminovyja pierśpiektyvy i zadačy, u šerahu jeŭrapiejskich krainaŭ, u pieršuju čarhu tych, što zaležali ad rasijskaha hazu amal na 100%, znajšli vyjście ź situacyi.
Naprykład Hrecyja kampiensavała niedachop «hazpromaŭskich» pastavak hazam z Ałžyru i Azierbajdžanu. Adhetul Afiny i nadalej płanujuć nabyvać haz u Azierbajdžanie. Papiaredniaja damoŭlenaść užo dasiahnutaja. Z Baku damovilisia taksama Turcyja i Italija.
Aŭstryja, jakaja na 70% zaležyć ad pastavak z Rasii, na dadzieny momant raźličvaje na ŭłasnyja siły. Jak i Rumynija.
U składanaj situacyi apynulisia Sierbija, dzie hazavy kryzis ledź nie pieraros u palityčny. Nahadajem, što pry kancy minułaha hodu nasupierak supraciŭleńniu apazicyi aficyjnaja Sierbija padpisała z Rasijaj šerah damovaŭ u śfiery enierhietyki. Siarod jakich i pra pabudovu hazapravodu «Paŭdniovaja płyń». Šerah krainaŭ, jakija najbolš paciarpieli ad spynieńnia pastavak hazu, pryniali rašeńnie pra adnaŭleńnie pracy svaich AES. Heta datyčyć Słavienii i Bałharyi.
U składany čas jeŭrapiejskija krainy prademanstravali salidarnaść sa svaimi susiedziami: Hiermanija i Vienhryja dapamahli hazam Sierbii i Charvatyi, Ukraina prapanavała padtrymku Małdovie i Bałharyi.
Ekśpierty ličać, što Jeŭropa zdolnaja vynieści z apošniaha kanfliktu ŭrok.
«Hazavaja vajna abjadnaje Jeŭropu i zabiaśpiečyć padtrymku novaj enierhietyčnaj palitycy Jeŭrakamisii, a mienavita skaračeńniu impartu hazu ŭ paraŭnańni z papiarednimi płanami»,— vykazaŭ upeŭnienaść staršynia East European Gas Analysis Michaił Karčomkin. Na jaho dumku, heta moža abiarnucca katastrofaj dla «Hazpromu».