Čystaja nafta pastupić na naftapierapracoŭčy zavod u Mazyry 2-3 maja. Pra heta žurnalistam raspaviali ŭ Minenierha Rasii, piša RBK
Jak patłumačyli ŭ viedamstvie, kala 17:00 ekspartnaja nafta, jakaja adpaviadaje technałahičnym standartam, dasiahnuła rasijska-biełaruskaj miažy. Zychodziačy z hetaha ŭ Minenierha vykazali zdahadku, što na NPZ u Mazyry jaje atrymajuć 2-3 maja, havorycca ŭ paviedamleńni viedamstva.
U viedamstvie padkreślili, što narmalizacyja jakasnych charaktarystyk nafty, jakaja pastupaje ŭ port Uść-Łuha, čakajecca 7 maja.
Dniom 29 krasavika pradstaŭnik vice-premjera Rasii Dźmitryja Kozaka Illa Džus raspavioŭ pra toje, što jakasnaja nafta pa trubapravodzie «Družba» dasiahnuła dyśpietčarskaj stancyi «Unieča» u Branskaj vobłaści, jakaja miažuje ź Biełaruśsiu.
26 krasavika namieśnik ministra enierhietyki Rasii Pavieł Sarokin pa vynikach sustrečy apierataraŭ «Družby» ŭ Minsku paabiacaŭ, što čystaja nafta pryjdzie na zavod u Mazyry ŭ pačatku maja, a praz dva tydni dasiahnie miažy Biełarusi i Polščy.
Sprečka vakoł niajakasnaj nafty, jakaja pastupaje pa «Družbie», pačałasia 19 krasavika. Tady kampanija «Biełnaftachim» paviedamiła, što ŭ rasijskaj nafty ŭtrymlivajucca chłorarhaničnyja złučeńni, «jakija pieravyšajuć u dziasiatki razoŭ hraničnyja značeńni». Paźniej niekalki krain, u tym liku Hiermanija, Polšča i Ukraina, prypynili pastaŭki syroj nafty z Rasii pa naftapravodzie «Družba».
