Amal tracina apytanych ni razu nie zajmałasia seksam za apošni miesiac, i tolki 40% ludziej mieli seks čaściej, čym raz na tydzień.
Vyniki hruntoŭnaha apytańnia, praviedzienaha ŭ Brytanii, pakazvajuć, što brytancy stali zajmacca seksam radziej. Miedyki apytali 34 tysiačy čałaviek va ŭzroście ad 16 da 44 hadoŭ. Vyniki publikuje British Medical Journal.
Vyniki pakazvajuć evalucyju pavodzin ludziej, bo anałahičnyja apytańni pravodzilisia ŭ 1991, 2001 i 2012 hadach.
U 2001 hodzie prykładna čverć apytanych nie zajmalisia seksam ni razu za apošni miesiac. U 2012 hodzie takich ludziej stała ŭžo bolš za 29% i siarod mužčyn, i siarod žančyn.
Najbolš seksualnaja aktyŭnaść źniziłasia ŭ parach, u tym liku siamiejnych, starejšych za 25 hadoŭ, jakija žyvuć razam.
Voś niekatoryja vyniki apytańnia.
— Tolki 41 % ludziej va ŭzroście ad 16 da 44 hadoŭ za miesiac, jaki papiaredničaŭ apytańniu, zajmalisia seksam raz na tydzień ci čaściej.
— Z 2001 da 2012 hoda dola ludziej, jakija zajmalisia seksam 10 i bolš razoŭ za miesiac, upała z 20,6 % da 13,2 % siarod žančyn i z 20,2 % da 14,4 % siarod mužčyn.
35—44 hadovyja mužčyny ŭ siarednim zajmajucca seksam 3 razy na miesiac, žančyny — 2 razy na miesiac.
Daśledčyki z London School of Hygiene and Tropical Medicine kažuć, što źnižeńnie seksualnaj aktyŭnaści adbyłosia siarod ludziej, jakija ŭžo byli seksualna aktyŭnymi raniej. Kolkaść ludziej, jakija zachoŭvajuć seksualnuju niavinnaść, zastajecca prykładna niaźmiennaj.
Pałova žančyn i dźvie traciny mužčyn zajaŭlajuć, što chacieli b zajmacca seksam bolš, pryčym hetaje žadańnie asabliva vyjaŭlajecca ŭ ludziej žanatych.
Prafiesar Kiei Uelinhz miarkuje, što pryčyna padzieńnia seksualnaj aktyŭnaści — banalnaja zaniataść ludziej, imklivy rytm sučasnaha žyćcia. Najmienš zajmajucca seksam ludzi siarednich hadoŭ, jakija razryvajucca miž pracaj, dziećmi i dapamohaj sastarełym baćkam.
U toj ža čas daśledčyki adznačajuć, što spad seksualnaj aktyŭnaści supadaje z raźvićciom sacsietak, što moža być dadatkovym čyńnikam.
Ale daśledčyki vykazvajuć i mierkavańnie, što, mahčyma, u našy časy ludzi prosta pačali bolš sumlenna adkazvać na pytańni daśledčykaŭ. Raniej ludzi zavyšali adkazy pra svaju seksualnuju aktyŭnaść, kab adpaviadać hramadskim stereatypam. Ciapier usio mienš ludziej ličyć, što časty seks — heta dobra i abaviazkova. Jakaść važniejšaja za kolkaść — tak ciapier miarkuje ŭsio bolš ludziej.
