Biełarusy skardziacca, što im siońnia stali prychodzić SMS-spravazdačy ab śpisańni srodkaŭ za pakupki, jakija jany nie ździajśniali. U niekatorych źniali hrošy za pakupki hadavoj daŭnaści. Jak vyśvietliłasia, srodki paŭtorna śpisvalisia z MTBanka, u tym liku z kartak navat inšych bankaŭ za apieracyi, jakija raniej pravodzilisia praz terminały hetaha banka. U MTBanku kažuć, što heta adbyvajecca z-za zboju ŭ ich sistemie, jaki zdaryŭsia 11 maja, piša Tut.by.
— Siońnia apoŭdni pryjšło SMS ad majho banka ab śpisańni hrošaj — 44,8 rubla. Napisana, za pakupku ŭ kramie sotavaj suviazi. Ale ja ničoha nie kuplała siońnia nie tolki tam, ale i naohuł dzie b tam ni było, — raspaviadaje minčanka Volha. — Patelefanavała ŭ Alfa-Bank, u jakim absłuhoŭvajusia. Tam paprasili prabačeńnia, rastłumačyli, što ŭ MTBanku adbyŭsia niejki zboj i ŭ ludziej śpisvajucca hrošy z kart za pakupki hadavoj daŭnaści. Dziaŭčyna-kansultant skazała, što na praciahu niekalkich dzion hrošy viernuć na kartu. Ale pry čym tut MTBank, kali ja absłuhoŭvałasia ŭ inšym banku?
U MTBanku paćvierdzili — śpisańni sapraŭdy adbyvajucca z-za kartačnaha zboju.
— U vyniku kartačnaha zboju 11 maja niekatoryja apieracyi hadavoj daŭnaści byli vystaŭlenyja da paŭtornaj apracoŭki, — prakamientavali śpiecyjalisty MTBanka. — Supracoŭniki banka pryniali apieratyŭnyja miery pa likvidacyi ŭźnikłaj pamyłki. U admienie apieracyi ŭdzielničajuć bank-emitent i bank-ekvajer. Na žal, z-za režymu vychadnoha dnia ŭ niekatorych bankach nie ŭsie apieracyi byli admienienyja adrazu. U takich vypadkach viartańnie pamyłkova śpisanych hrošaj budzie praviedziena ŭ pačatku pracoŭnaha tydnia.
U MTBanku ŭdakładnili, što śpisanyja srodki buduć viernutyja da 15 maja.
Nahadajem, z 4 pa 10 maja MTB bank ździajśniaŭ pierachod na novuju aŭtamatyzavanuju sistemu bankaŭskaj dziejnaści. U banku papiaredžvali, što ŭ hety pieryjad mahčymyja časovyja techničnyja zboi ŭ pracy kart i servisaŭ banka.
