U śviecie raspaŭsiudzilisia źviestki, što paŭnočnakarejski dyktatar Kim Čen Ir pryznačyŭ sabie pierajemnika, treciaha syna – Kim Čen Una.
“Usio heta na 99% – čarhovaja kačka, jakimi ŭžo pierakarmili,” – piša ŭ svaim žyvym dziońniku adzin ź lepšych znaŭcaŭ Paŭnočnaj Karei Andrej Łańkoŭ.
“Paru miesiacaŭ tamu z amal takoj ža ŭpeŭnienaściu kazali, što spadčyńnikam stanie Čan Son-tchek. A pierad hetym havaryli pra starejšaha Kim Čon-nama. A jašče pieryjadyčna paviedamlajuć, što "napeŭna" pryznačać siaredniaha, Kim Čon-čchola. I pra ciapierašniuju bajavuju siabroŭku Pałkavodca, Kim Ok, taksama havaryli. Raniej chvala hetych čutak (zaŭsiody niepaćvierdžanych) padnimałasia raz u paŭtary hady. Ciapier – ledźvie nie kožnyja try miesiacy. Što heta takoje, što za hetym staić, čamu raptam hetyja prystupy rehularnaj miedyjnaj šyzafrenii niečakana tak pačaścilisia...
Paŭdniovakarejskaja vyviedka pramacoŭvaje situacyju? Paprostu. Hrupoŭki ŭ Pchieńjanie źlivajuć infu praz svaich ludziej u Mańčžuryi i ŭ japonskim Čchonrenie? Vierycca ź ciažkaściu, ale całkam mahčyma. Amierykancy sprabujuć destabilizavać situacyju? Małavierahodna, ale całkam vyklučyć taksama nielha. Žurnaluhi (japonskija, chutčej za ŭsio) dla padvyšeńnia tyražoŭ vydumlajuć? Ci ledź nie samaje vierahodnaje.
…Kali kahości pryznačać, to my pra heta daviedajemsia. Pa pačatku kampanii ŭ aficyjnym (i całkam adkrytym) paŭnočnakarejskim druku, pa źjaŭleńni partretaŭ. Pakul hetaha niama - usie čutki treba pasyłać u topku…
Narešcie, navat kali Pałkavodziec sapraŭdy kahości pryznačyć, i my niejkim cudam pra hetaje jahonaje rašeńnie daviedajemsia peŭna, to hetaje viedańnie ŭsio roŭna nie budzie značyć ničoha. Ni ab kim z 5-6 patencyjnych kandydataŭ tołkam nie viadoma roŭna ničoha palityčna važnaha (nu, ab Čan Son-tcheku sioje-toje takoje viadoma, ale zusim trochi). Tamu navat viedańnie imia pierajemnika ničoha nie skaža pra toj kurs, jaki jon budzie pravodzić,” – kaža Andrej Łańkoŭ.
