Pa infarmacyi vydańnia «Kommiersant», MUS Rasii padazraje ŭładalnika staličnaha šmatprofilnaha miedycynskaha centra «F Kliniks» Paŭła Frałova ŭ arhanizacyi maštabnaj, fiederalnaha ŭzroŭniu afiory pa akazańni darahoj, ale całkam niepatrebnaj miedycynskaj dapamohi.
Frałoŭ - hramadzianin Biełarusi, jaki žyvie ŭ Maskvie. Pa viersii palicyi, padkantrolnym Frałovu daktaram u roznych haradach Rasii ŭdałosia «vylečyć» bolš za 11 tysiač zdarovych hramadzian i atrymać ź ich za heta kala 1 miljarda rasijskich rubloŭ (bolš za $15 miljonaŭ). Pradstaŭniki biznesmiena pierakananyja, što toj nie mieŭ dačynieńnia da machinacyj, a skarhi na jaho byli inicyjavanyja kankurentami.
Viadoma, što Frałoŭ mieŭ sietku miedycynskich ustanoŭ, jakija dziejničali ŭ niekalkich haradach Rasii.
Siłaviki ličać, što z koł-centraŭ Frałova telefanavali starym, pierakonvali tych, što varta prajści miedahlad mienavita ŭ ich miedklinikach. Paśla ŭ klijentaŭ «znachodzili» chvaroby i pačynali «lačeńnie». Kali hrošaj u ludziej nie było, to supracoŭniki klinik Frałova dapamahali «pacyjentam» aformić kredyty ŭ bankach. Ahułam paciarpieła kala 11 tysiač čałaviek.
Pa spravie zatrymali ŭžo 25 čałaviek — i zatrymańni praciahvajucca.
Zatrymali Frałova ŭ Maskvie, paśla čaho adpravili ŭ Čuvašyju, u horad Čabaksary. Tam sud vyrašyŭ źmiaścić Frałova pad vartu na dva miesiacy. Sprava ŭ tym, što miascovyja śledčyja padazrajuć biznesmiena ŭ machlarstvie ŭ asabliva bujnych pamierach, jon moža sieści na 10 hadoŭ.
Advakat Frałova śćviardžaje, što jaho klijent adkryŭ tolki maskoŭskuju kliniku, a pra dziejnaść inšych miedcentraŭ — u tym liku i čuvašskaha — nie viedaŭ.
«Uličvajučy mižrehijanalny charaktar mierkavanych złačynstvaŭ, kryminalnuju spravu z Čuvašyi nieŭzabavie moža być pieradadziena ŭ śledčy departamient MUS, dzie jaho pierakvalifikujuć na art. 210 KK Rasii (arhanizacyja złačynnaj supolnaści abo ŭdzieł u joj)», — piša «Kommiersant». A heta ŭžo — da 25 hadoŭ pazbaŭleńnia voli.
