Pavodle Trachimčyka, dva hady tamu Arciom Bukaviec (trenier Biełaruskaj fiederacyi tryjatłonu) prapanavaŭ jamu ŭžyvać dopinh.
Hetaja historyja ŭspłyła vypadkova — paśla taho, jak Bukaviec pakinuŭ kamientar na adras Trachimčyka pad dopisam inšaha tryjatłanista. Ciapier Alaksiej Trachimčyk maje inšaha treniera i žyvie ŭ Ispanii.
«Historyja hetaja ŭspłyła tolki ciapier, bo hety čałaviek [Arciom Bukaviec. — Zaŭv. Belsat.eu] nie ŭpuskaŭ mahčymaści mianie začapić dzieści ŭ kamientarach, paprakajučy tym, što maje vyniki nie mohuć być značnyja biez dopinhu», — raspavioŭ Belsat.eu Alaksiej Trachimčyk.
Spartoviec śćviardžaje, što prapanova dopinhu zmusiła jaho razarvać supracu z trenieram.
Alaksiej Trachimčyk. Fota — facebook.com/trakhimshyk
«Ja prosta nie zachacieŭ pracavać z hetym čałaviekam. Heta nienarmalna, što trenier Biełaruskaj fiederacyi tryjatłonu tak u adkrytuju prapanoŭvaje dopinh. Tady ja vyrašyŭ pramaŭčać. A ciapier, kali jon piša ŭsio heta i nie baicca adkaznaści… Piša pra heta ŭ sacsietcy (kamientary ŭžo vydalenyja), a paśla jašče i ŭ pryvatnyja paviedamleńni, što mnie pra heta treba maŭčać — heta nienarmalna, kali takoje robić trenier nacyjanalnaj zbornaj. Čamuści jon nie baicca tak kazać», — patłumačyŭ spartoviec.
Arciom Bukaviec u razmovie z Belsat.eu zajaviŭ, što nikoha nie schilaŭ da ŭžyvańnia dopinhu. Trenier śćviardžaje, što Trachimčyk nie byŭ jahonym vychavancam i naahuł nie prafiesijny spartoviec. Bukaviec kaža, što niekatory čas tamu prosta dystancyjna kansultavaŭ Trachimčyka — chłopiec chacieŭ zajmacca sportam, zadavaŭ trenieru peŭnyja pytańni, a toj jamu adkazvaŭ.
«Trachimčyk nie spartoviec i nie maje dačynieńnia da spartovaj škoły. Heta čałaviek z vulicy, jaki pracuje na zavodzie. Kaliści jon da mianie źviarnuŭsia, prasiŭ dapamahčy, bo chacieŭ pačać trenavacca. U peŭny momant jon pacikaviŭsia: a što prymajuć prafiesijnyja spartoŭcy ŭ jakaści dopinhu? Nu ja i adkazaŭ toje, što čytaŭ u internecie. Prymaŭ jon niešta potym abo nie prymaŭ — nie viedaju. A ciapier jon śćviardžaje, što ja nibyta schilaŭ jaho prymać dopinh. Chłuśnia. Navat kali ja daŭ peŭnuju infarmacyju, to što tut takoha? Hetuju infarmacyju moža luby zahuhlić», — adznačyŭ Bukaviec.
Pavodle Trachimčyka, da jaho ŭžo źviarnułasia Nacyjanalnaje antydopinhavaje ahienctva Biełarusi dy prapanavała pakinuć zajaŭku «ab najaŭnaści parušeńniaŭ».
U razmovie z Belsat.eu spartoviec adznačyŭ, što pakul nie pryjedzie ŭ Biełaruś, bo baicca nastupstvaŭ skandału.
«Ja nie viedaju, jakija ŭ mianie mohuć być prablemy praz heta. Ja dumaju, što napiaredadni Jeŭrapiejskich hulniaŭ budzie vialiki rozhałas», — miarkuje Alaksiej Trachimčyk.
