Moŭnaja zaŭvaha ad Alesia Kaŭrusa — z pošty Redakcyi.
Daŭno zacikaviŭsia paetyčnaj tvorčaściu Viktara Žybula. Tamu dla mianie nie była niečakanaj atestacyja, jakuju dała paetu «NN» (18.12.2008), drukujučy jaho vierš «Doktar Ałkahol»: «Viktar Žybul adzin z najlepšych paetaŭ pakaleńnia 30-hadovych».
U hetym daścipnym tvory, na žal, sustreŭsia radok, pra jaki (jak by nie chaciełasia) mušu skazać.
Da doktara Ałkahola, jaki «ŭsim zdymaje bol», pryjšła z svajoj biadoju Marynka — pryznałasia, što joj u paštovuju skrynku niechta ŭkinuŭ žyvuju myš. A z hetaj pryčyny «Ni paješ, ni śpiaješ, ni paśpiš».
Zhadany karotki radok maje dźvie vialikija chiby.
Ni paješ — čysty rusizm. Jon rasčytvajecca tak: nie padjasi (źjasi) abo nie mahu padjeści (jeści), ni padjeści…
I jašče. Jak bačym, u skazie admaŭlajecca mahčymaść ažyćciaŭleńnia dziejańniaŭ, abaznačanych dziejasłovami pajeści (padjeści), śpiajać, paspać. Značyć, pry hetych dziejasłovach u formie druhoj asoby adzinočnaha liku abviesnaha ładu pavinna być admoŭnaja čaścica nie: nie padjasi, nie śpiaješ, nie paśpiš.
Prykryja niedahlady…
Pakaz kankretnych adchileńniaŭ ad litaraturnych normaŭ biełaruskaj movy padparadkavany dasiahnieńniu hałoŭnaj mety: kab uvohule takija «myšy» ŭ hazietnych i časopisnych tekstach jak maha radziej traplali ŭ paštovyja skrynki čytačoŭ.