Na niezaležnuju spartyŭnuju hazietu «Priessboł» padali ŭ sud za kamientar pakinuty na internet‑forumie vydańnia.
Padali dva supracoŭniki haziety «Sportivnaja panorama» I.Čumakova i A.Bican. Pieršapačatkova ich pretenzii byli da publikacyi hałoŭnaha redaktara «Priessboła» Uładzimira Bieražkova «Kab skraści miljard, treba, kab niechta jaho zarabiŭ». Tam adznačałasia: «I čamu «tłustyja katy» z sytaha orhana Minsportu… navat nie dychajuć nam u śpinu, a fyrkajuć nam uśled».
Čumakova i Bican skłali pazoŭ, dzie pisali, što «tłustymi katami» ich ciapier nazyvajuć kalehi, znajomyja, navat svajaki. A jašče «Sportivnaja panorama» nijakaja nie «sytaja», bo ŭ ich niama słužbovaha aŭtamabila, spadarožnikavaj anteny, teleciuneraŭ, nie chapaje słužbovych pamiaškańniaŭ.
U vyniku supracoŭniki dziaržaŭnaj haziety paličyli, što abraza ich honaru paciahnie na 50 miljonaŭ rubloŭ. Potym pazoŭniki dadali jašče 10 miljonaŭ za paviedamleńnie pakinutaje na sajcie «Priessboła» niejkim «Hlipam». Tam była źmieščana fatahrafija toŭstych katoŭ, jakija śpiać z podpisam: «Tak Čumakova i Bican bačać svaju bližejšuju budučyniu… Chu jość chu — vyrašajcie sami».
5 listapada sud Centralnaha rajonu adchiliŭ patrabavańni pazoŭnikaŭ. Potym była skarha ŭ Minski haradski sud, jaki admianiŭ raniejšaje rašeńnie, i nakiravaŭ spravu na pierarazhlad.
Internet usio jašče nie papadaje pad dziejańnie «Zakonu ab ŚMI». Razam z tym, vypadak z «Priessbołam» nie taki ŭžo ŭnikalny. Raniej Minski haspadarčy sud pryniaŭ rašeńnie pryznać sajt www.ucpb.org ułasnaściu Abjadnanaj hramadzianskaj partyi. A za publikacyju ŭ internecie za kratami akazaŭsia palityk Andrej Klimaŭ.
