Z 1 studzienia ŭ Biełarusi ŭstupili ŭ siłu novyja dziaržaŭnyja standarty na śmiatanu, viarški, płaŭlenyja syry, kaŭbasy syravialenyja i syravendžanyja, a taksama na naturalnyja miasnyja paŭfabrykaty.Jak raspaviali ŭ adździele standartyzacyi i narmavańnia Instytutu miasa‑małočnaj pramysłovaści, novyja standarty ŭzmacnili patrabavańni da jakaści hetych praduktaŭ.
Tolki paŭfabrykaty!
Doŭhi čas biełaruskija vytvorcy realizoŭvali miasa ŭ paŭtušach i čvertkach, a na kavałki roznaj masy jaho raździełvali na rynkach i ŭ kramach. Vyvučyŭšy dośvied inšych krain, admysłoŭcy Instytutu miasa‑małočnaj pramysłovaści vyrašyli, što za miažoj tak miasam užo daŭno nie handlujuć: u kramy jaho pastaŭlajuć adrazu ŭ vyhladzie paŭfabrykataŭ. Heta zručna i vytvorcam, i pakupnikam. Tamu zaraz pa takoj samaj schiemie buduć pracavać i ŭ nas.
Normy standartu zabaraniajuć vykarystać dla padrychtoŭki miasnych paŭfabrykataŭ miasa bykoŭ, knyroŭ i kazłoŭ, zamarožanyja bolš adnaho razu śvininu i jałavičynu, a taksama śvininu z žoŭkłym špikam. Nieprydatnymi ličacca jałavičyna, jakaja zachoŭvałasia bolš za šeść miesiacaŭ, i śvinina trochmiesiacovaj daŭnaści. Akramia taho, dakładna akreślena dapuščalnaje ŭtrymańnie tłušča. Naprykład, u kuskavoj jałavičynie, baraninie i kaźlacinie taŭščynia padskurnaha tłuščavaha płastu pavinna być nie bolšaj za 10 milimietraŭ, a ŭ śvininie — 25 milimietraŭ. U jałavičnym katletnym miasie dola tłušču nie pavinna pieravyšać 25 adsotkaŭ, a ŭ śvinym — 35 adsotkaŭ.
Jak kaŭbasy «śpiejuć»
Novy dziaržaŭny standart na syravialenyja i syravendžanyja kaŭbasnyja vyraby sparadkavaŭ usie techničnyja ŭmovy.
Tak, suchija kaŭbasy vyrablajuć pa tradycyjnych technałohijach, za 35‑40 sutak, u ich mała vilhaci, i tamu jany daŭžej zachoŭvajucca. Za hety čas kaŭbasa «śpieje» naturalnym čynam, sama nabiraje vodar, tamu niama nieabchodnaści dadavać u jaje ŭzmacnialniki hustu (hłutamat natryju). U paŭsuchich kaŭbasaŭ praces vyśpiavańnia karaciejšy, da 25 sutak. Vytvorcy damahajucca hetaha z dapamohaj zaniasieńnia mikrabijałahičnych startavych kultur. Akramia taho, u standarcie dakładna akreślena, jakuju syravinu možna vykarystać dla padrychtoŭki kaŭbas, a jakuju nielha.
Na kaŭbasu salami płanujecca raspracavać asobny standart, tamu što ŭ jaje niekalki inšaja technałohija vyrabu, pry jaje vytvorčaści vykarystoŭvajucca charčovyja kisłoty i cukry. Salami źjavilisia na biełaruskim rynku tolki ŭ apošniaje dziesiacihodździe, i pakul ich vyrablajuć pavodle techničnych umovaŭ.
Białok jak prykmieta naturalnaści
Limitavaja masavaja dola tłušču ŭ śmiatanie z hetaha času moža być ad 10 da 40 adsotkaŭ. Upieršyniu ŭstalavanyja normy pa ŭtrymańni ŭ śmiatanie małočnaha białku, najaŭnaść jakoha kaža pra jaje naturalnaść. Tłuščy taksama pavinny być tolki naturalnymi, jak u małace, ź jakoha jaje vyrabili. Kali vytvorca vyrašyć uvieści ŭ śmiatanu białki i tłuščy raślinnaha pachodžańnia, to hety pradukt užo nie zmoža zvać śmiatanaj — tolki śmiatannym praduktam.
«Žyvuć» daŭžej
Pitnyja viarški zaraz taksama narmujucca pa ŭtrymańni białku. Akramia pasteryzavanych u standart uklučanyja jašče dva novych ich vidy — sterylizavanyja i UVT‑apracavanyja, heta značyć apracavanyja pry ultravysokich tempieraturach (vyšej za 140 hradusaŭ). Roźnica pamiž imi składajecca ŭ terminach zachoŭvańnia. Kali pasteryzavanyja viarški zachoŭvajucca ŭsiaho 36 hadzin, to sterylizavanyja — ad 25 sutak i bolej, a UVT‑apracavanyja — niekalki miesiacaŭ u zaležnaści ad tempieratury.
Syr bieź dzirak
Sapraŭdny płaŭleny syr pavinien utrymlivać naturalnyja tłuščy, raślinnyja dapuščalnyja tolki dla praduktu syrnaha płaŭlenaha. U syrach, jakija vyrablajucca zhodna z standartam, nie pavinna być stabilizataraŭ kansistencyi.
Źjaviłasia novaja raznavidnaść płaŭlenych syroŭ — suchi syr. Jon vypuskajecca ŭ vyhladzie zdrobnienaha parašku i vykarystoŭvajecca jak dadatak u stravy. U zaležnaści ad dadatkovaj apracoŭki akramia vendžanych syroŭ prava na žyćcio atrymali pasteryzavanyja i sterylizavanyja płaŭlenyja syry.
Zaraz płaŭleny syr moža nasić nazoŭ, anałahičny syčužnamu syru, ź jakoha jon pryhatavany, pry adnym umovie: hetaha syčužnaha syru ŭ syrnaj sumiesi pavinna być nie mienš za 75 adsotkaŭ.
Dziesiać hramaŭ — na darožku
Niahledziačy na to što standart na masła ŭstupaje ŭ siłu tolki z 1 lipienia 2009 hady, niekatoryja pradpryjemstvy pačynajuć pa im pracavać užo ciapier. Jon dazvoliŭ im vyrablać masła tłustaściu ad 50 da 85 adsotkaŭ. U toj ža čas u standarcie zachavanyja tradycyjnyja vidy masła: kali dola tłušču 78 adsotkaŭ — heta «Amatarskaje», 72,5 adsotkaŭ — «Sialanskaje», 61,5 — «Buterbrodnaje». Takim čynam, kali vytvorca vypuskaje masła, skažam, z masavaj dolaj tłušču 50 adsotkaŭ, to jon nie moža na jaho pakavańniu napisać «Sialanskaje», da jakoha pakupnik daŭno abvyk i čakaje ad jaho stabilnaha hustu i jakaści.
U maśle białki i tłuščy pavinny być tolki naturalnymi. Kali ich zamianiajuć na raślinnyja, to heta ŭžo nie alej, a spred. Uzmacnilisia patrabavańni da syraviny, ź jakoha vyrablajuć masła: naprykład, dla masła 80‑adsotkavaj tłustaści i vyšej małako i viarški pavinny być nie nižejšyja za pieršy hatunak. Kali raniej minimalnaje pakavańnie masła było 100 hramaŭ, to zaraz jano moža być ad 10 hramaŭ, što vielmi zručna ŭ darozie.
