Biełaruskija vydaviectvy za 2008 vypuścili stolki knih, što kali skłaści ich nakłady dy padzialić na kolkaść biełarusaŭ, na adnaho čałavieka vyjdzie amal 6 knih.
Ale tolki kožnaja 15‑ia kniha ŭ Biełarusi vydajecca na biełaruskaj movie. Heta mimachodź adznačyŭ učora na presavaj kanferencyi namieśnik ministra infarmacyi Ihar Łapcionak. Spadar Łapcionak paviedamiŭ, što za 2008 hod u krainie vyjšła ŭ śviet 13 290 najmieńniaŭ knih, ź ich pa‑biełarusku — 879, a heta — prykładna tolki kožnaja 15‑ia. Nakład biełaruskamoŭnych knih u 2008 hodzie skłaŭ razam 3 miljony 50 tysiač asobnikaŭ, ci 5,5% ad ahulnaha nakładu vydadzienych knih. Heta značycca, što kali raptam usie hramadzianie Biełarusi zachočuć razam nabyć pa biełaruskaj knižcy, chopić tolki kožnamu treciamu.
Namieśnik ministra adznačyŭ, što ŭ paraŭnańni ź 2007 hodam kolkaść biełaruskamoŭnaj litaratury skaraciłasia na 7 adsotkaŭ. Łapcionak ličyć, što pryčyna hetaha — popyt. Bo vydaviectvy drukujuć toje, što kuplajecca. A kuplajucca, pavodle čynoŭnika, daviedniki, słoŭniki, dapamožniki dy encyklapedyi.
Aproč kolkaści najmieńniaŭ knih, Ihar Łapcionak ahučyŭ ličby j pa nakładach. U 90‑ch hadach siaredni nakład vydadzienaj u Biełarusi knihi składaŭ 10‑15 tysiač asobnikaŭ, siońnia — krychu bolej za 4 tysiačy.