Fota: Stanisłaŭ Koršunaŭ, TUT.BY
U niadzielu na płoščy Lenina ŭ Breście tradycyjna sabralisia pratestoŭcy. Kala 12.00 da lidaraŭ pratestu padyšli supracoŭniki harvykankama i zaprasili ŭ kanfierenc-zału abłasnoha kamiteta Fiederacyi prafsajuzaŭ na dyjałoh ź miascovymi ŭładami, pieradaje TUT.BY.
Ludzi zaprašeńnie pryniali. Raźličanaja na 250 miescaŭ zała była zapoŭnienaja pad zaviazku. Razam z meram Alaksandram Rahačukom u prezidyumie siadzieŭ namieśnik staršyni Bresckaha abłvykankama Hienadź Barysiuk.
Fota: Stanisłaŭ Koršunaŭ, TUT.BY
— Važna razumieć, što ŭ pracesie budaŭnictva ŭ nas byli jakija zychodnyja? Prajekt, jaki prajšoŭ ekałahičnuju ekśpiertyzu, sam inviestar, dobry ci drenny — heta ŭžo inšaja tema, i sam fakt budaŭnictva. I tut «kryć» było niama čym. Ciapier, kali zavod ŭstupiŭ u stadyju pačatku vytvorčaści, jość vyrazny instrumientar, kab pahladzieć, ci atrymałasia štości ŭ hetaha inviestara, ci budzie zavod pracavać naohuł i, kali jość niejkija značnyja adchileńni, dyk jak jaho zakryć. Voś i ŭsio, — adznačyŭ Alaksandr Rahačuk pad apładysmienty prysutnych.
Staršynia Bresckaha harvykankama taksama zakranuŭ temu kopii dakładnoj zapiski abłasnoha pryrodaachoŭnaha kamiteta ŭ abłvykankam, jakaja patrapiła ŭ internet, u jakoj havorycca pra pieravyšeńnie na zavodzie «vyznačanych narmatyvaŭ dapuščalnych vykidaŭ zabrudžvalnych rečyvaŭ u atmaśfiernaje pavietra ad narmatyŭnych stacyjanarnych krynic vykidaŭ».
— Heta aficyjny dakumient, jaki paćviardžaje, imavierna, pamyłkovaść i, moža być, niedaskanałaść hetaha prajekta. Dakumient nichto nie prychoŭvaŭ. U subotu Ministerstva achovy navakolnaha asiarodździa paćvierdziła, što pačynajecca administracyjny praces ab pryciahnieńni zavoda da adkaznaści za toje, što nie vykonvajecca zajaŭlenaje. Paralelna idzie praca dziaržaŭnaj ekałahičnaj ekśpiertyzy, jakaja taksama nie dała stanoŭčaha zaklučeńnia. Padstaŭ dla pusku zavoda niama na hety momant, — paviedamiŭ Alaksandr Rahačuk.
Čytajcie: Na zavodzie AKB pad Brestam — pieravyšeńnie škodnych vykidaŭ. Raspačaty administracyjny praces
Fota: Stanisłaŭ Koršunaŭ, TUT.BY
Mer prapanavaŭ adnamu ź lidaraŭ pratestnaha ruchu Dziamjanu Lepiasieviču sabrać hrupu z 10 čałaviek na sustreču sa staršynioj abłvykankama Anatolem Lisam pa pytańniach akumulatarnaha zavoda. Čakajecca, što baki źbiarucca ŭ sieradu, 12 červienia.
— Zaraz nam treba vyrašyć pytańnie kanceptualna: zavod pracavać budzie ci nie budzie, — reziumavaŭ mer.
Akramia taho, Alaksandr Rahačuk nahadaŭ toje, pra što raniej kazaŭ hubiernatar: kali buduć znojdzienyja parušeńni, to akumulatarny zavod pracavać nie budzie.
— Niaŭžo vy dumajecie, što ja chaču ŭvajści ŭ historyju nie jak mer, jaki horad padramantavaŭ da 1000-hodździa, a jak budaŭnik akumulatarnaha zavoda? — adznačyŭ Alaksandr Rahačuk.
Fota: Stanisłaŭ Koršunaŭ, TUT.BY
Dziamjan Lepiasievič padtrymaŭ prapanovu mera, ale padkreśliŭ, što lubyja raboty na zavodzie nieabchodna nieadkładna spynić. Pavodle jaho słoŭ, ludzi aścierahajucca, što 11 červienia pryjomačnaja kamisija padpiša akt ab uvodzie zavoda ŭ ekspłuatacyju.
— Spyniajcie da sierady hety zavod. Jakaja vy ŭłada, kali pažarnych na zavod nie puskajuć? Jakaja vy ŭłada, kali kamitet achovy pryrody nie moža zajechać na zavod? Vy kažacie, što ničoha nie možacie. Vy ŭsio možacie, kali chočacie i vam heta treba. Dyk voś, kali łaska, začynicie da sierady hety zavod.
Sustreča ŭ zale abłasnoha savieta prafsajuzaŭ praciahvałasia kala 30 chvilin. Čakajecca, što ŭ sieradu hrupa aktyvistaŭ pryjdzie sa svaimi pytańniami na sustreču z hubiernataram.
Miescaznachodžańnie novaha akumulatarnaha zavoda pad Brestam. Hrafika: Radyjo Svaboda
