Nočču 14 červienia ŭ Hrodzienskim abłasnym pierynatalnym centry ździejśniła suicyd žančyna. Siabry i svajaki paradzichi kažuć, što nie zaŭvažali jakich-niebudź źmien u pavodzinach i stanie žančyny — ničoha, što vidavočna mahło b padšturchnuć 27-hadovuju Alenu da suicydu. Jana razam z mužam vielmi čakała naradžeńnia dački. Dzicia źjaviłasia na śviet 6 červienia, piša Tut.by.
Alena pracavała buchhałtaram u adnoj sa škoł Hrodna. Na jaje staroncy ŭ sacyjalnych sietkach — pazityŭnyja statusy pra kachańnie i adnosiny, fatahrafii z mužam i z padarožžaŭ.
- Zaŭsiody spakojnaja była, cichaja dziaŭčynka. Dačku jany z mužam vielmi čakali, da apošniaha ŭsio chavali. Bajalisia, napeŭna, kab nie suročyli, — kaža svajačka dziaŭčyny.
Na toje, pa słovach znajomych Aleny, byli pryčyny: niekalki hadoŭ tamu žančyna naradziła dzicia našmat raniej za termin, jano pamierła.
Pa słovach znajomych žančyny, Alenu ranicaj znajšli paviešanaj u stałovaj adździaleńnia, dzie jana lažała razam z dačkoj.
- Napiaredadni žančyna biez uskładnieńniaŭ naradziła zdarovaje dzicia. Jaje pavodziny nie vyklikali prablem, — raspavioŭ hałoŭny ŭrač abłasnoha pierynatalnaha centra Uładzimir Źviarko.
