Biełaruś nie zmoža pavysić uzrovień vady ŭ race Vilija, kab papoŭnić niedachop vodnych resursaŭ na litoŭskaj terytoryi, ličyć dyrektar RUP «Centralny navukova-daśledčy instytut kompleksnaha vykarystańnia vodnych resursaŭ» Alaksandr Stankievič, piša Interfax.by.
«U Biełarusi takija ž klimatyčnyja ŭmovy, jak i ŭ Litvie. Na žal, lišku vady niama. Najaŭny zapas u Vilejskim vadaschoviščy nieabchodny dla zabieśpiačeńnia vodnaha bałansu na terytoryi Biełarusi, u tym liku dla zabieśpiačeńnia pitnoj vadoj kala 30% nasielnictva Minska», — skazaŭ Stankievič.
Raniej litoŭskija ŚMI paviedamili, što ministr navakolnaha asiarodździa Litvy Kiastucis Mažejka źviarnuŭsia ŭ ministerstva pryrodnych resursaŭ i achovy navakolnaha asiarodździa Biełarusi z prośbaj dapamahčy adnavić uzrovień raki Vilija, jakaja praciakaje pa Biełarusi i Litvie.
«Situacyja, što skłałasia z uzroŭniami vady ŭ race Vilija znachodzicca ŭ miežach naturalnych vahańniaŭ uzroŭnievaha režymu, što na hety momant charakterna i dla bolšaści inšych rek Biełarusi. Asnoŭnaja pryčyna hetaj situacyi — małaja kolkaść apadkaŭ u pieršaj pałovie 2019 hoda. Pry pavieličeńni kolkaści apadkaŭ situacyja značna palepšycca», — adznačyŭ Stankievič.
Pavodle jaho słoŭ, tearetyčnaja mahčymaść pavieličeńnia padačy vady ź Vilejskaha vadaschovišča taksama strymlivajecca niavyznačanaściu hidramietearałahičnaha prahnozu.
Pry hetym jon adznačyŭ, što ŭ Biełarusi nie pravodzilisia raboty, jakija mahli paŭpłyvać na ŭzrovień vady ŭ Vilii.
