10 lipienia ŭ Bresckim abłasnym sudzie abviaścili prysud 44-hadovamu biełarusu, jaki abvinavačvaŭsia va ŭdziele va ŭzbrojenym kanflikcie na paŭdniovym uschodzie Ukrainy na baku samaabvieščanaj «Danieckaj narodnaj respubliki». Pra sud nad najomnikam piša TUT.BY.
Fota z asabistaj staronki abvinavačanaha va Ukantakcie
Mužčynu pryznali vinavatym va ŭdziele va ŭzbrojenym kanflikcie na terytoryi zamiežnaj dziaržavy i pryznačyli jamu pakarańnie ŭ vyhladzie pazbaŭleńnia voli na 2 hady ŭ kałonii ahulnaha režymu. Sud taksama ŭličyŭ źmiakčalnyja akaličnaści: jaŭku z pavinnaj, čystasardečnaje raskajańnie, aktyŭnaje spryjańnie vyjaŭleńniu złačynstva.
Abvinavačanaha zaklučyli pad vartu ŭ zale suda. Kali na im zašpilili kajdanki, jon spytaŭ sud, za što jaho tak surova pakarali.
Prysud nie ŭstupiŭ u zakonnuju siłu i moža być abskardžany.
Abvinavačany — žychar Bresta Vadzim. Adukacyja siaredniaja: skončyŭ Hancavickuju dapamožnuju škołu-internat. Da taho, jak źjechaŭ na Danbas, pracavaŭ na adnym z pradpryjemstvaŭ Bresta. Raniej trojčy pryciahvaŭsia da kryminalnaj adkaznaści za kradziažy.
Słužbu ŭ biełaruskim vojsku abvinavačany nie prachodziŭ pa zdaroŭi, ale heta nie pieraškodziła jamu trapić va ŭzbrojenyja farmiravańni samaabvieščanaj DNR. Na paŭdniovy ŭschod Ukrainy Vadzim pryjechaŭ u 2015 hodzie. Na pasiadžeńni 1 lipienia jon patłumačyŭ sudu, što «zapisaŭsia dobraachvotnikam pa idejnych mierkavańniach». Jaho zaličyli šarahoŭcam u šturmavy połk marskoj piachoty. Pieršy čas zajmaŭ pasadu namieśnika kamandzira bajavoj mašyny, zatym pieravioŭsia ŭ hranatamiotčyki. Vajavaŭ pad pazyŭnym Vietryk.
Vadzim braŭ udzieł u bajavych dziejańniach u vioscy Kaminternava Vałnavachskaha rajona Danieckaj vobłaści. Z 3 sakavika pa 10 lipienia 2016 hoda dysłakavaŭsia pablizu vioski Sochanka Novaazoŭskaha rajona, zatym — da 21 listapada — byŭ la linii raźmiežavańnia.
U 2017 hodzie Vadzim palacieŭ u Siryju. Pavodle jaho słoŭ, tam jon nie vajavaŭ, a pracavaŭ na naftabazie. U Siryi abvinavačvany pravioŭ dva miesiacy — z 23 kastryčnika da 21 śniežnia. Zatym viarnuŭsia ŭ DNR.
22 maja 2018 hoda bieraściejca zaličyli šarahoŭcam u bataljon danieckaj narodnaj milicyi na pasadu staršaha strałka. 1 žniŭnia jaho pieraviali ŭ kulamiotčyki. Za niekalki hadoŭ udziełu ŭ vajennym kanflikcie na paŭdniovym uschodzie Ukrainy Vadzim dvojčy byŭ paranieny: adzin raz u ruku, druhi — u nahu.
U kancy 2018 hoda jon źjechaŭ u Brest — nibyta ŭ adpačynak. U sudzie jon patłumačyŭ, što viartacca nazad nie źbiraŭsia z-za «aficerskaha biaźmiežža» va ŭzbrojenych farmavańniach DNR.
U Breście mužčyna napisaŭ jaŭku z pavinnaj i adnios jaje ŭ KDB. U dačynieńni da jaho raspačali kryminalnuju spravu i ŭziali pad vartu. Paźniej pieraviali pad chatni aryšt.
