Pucin paśla vybaraŭ 2024 hoda moža stać premjeram «z pašyranymi paŭnamoctvami» i lidaram partyi «Adzinaja Rasija», takim čynam jon zastaniecca va ŭładzie, paviedamili ahienctvu Bloomberg krynicy.
Pamočniki i daradcy prezidenta Uładzimira Pucina pracujuć nad tym, kab znajści sposab padoŭžyć jaho znachodžańnie va ŭładzie, piša Bloomberg sa spasyłkaj na krynicy, jakija ŭdzielničajuć u hetym pracesie.
Kreml razhladaje scenar sa źnižeńniem kolkaści deputataŭ Dziarždumy, jakija vybirajucca pa partyjnych śpisach, da 25%, i pavieličeńniem doli mažarytarnych deputataŭ, raspaviali ahienctvu dźvie krynicy, prainfarmavanyja pra padrychtoŭku takich źmien. U 2016 hodzie pałovu Dumy abrali pa partyjnych śpisach, pałovu — pa adnamandatnych akruhach.
Heta dazvolić Kramlu zachavać kantrol nad nižniaj pałataj va ŭmovach padzieńnia papularnaści «Adzinaj Rasii», havorycca ŭ artykule. Pieramieny mohuć ustupić u siłu da vybaraŭ 2021 hoda. Adzinarosy, praciahvajuć krynicy ahienctva, u takim vypadku pojduć na vybary jak farmalna niezaležnyja mažarytarščyki.
Źmianieńni dazvolać Pucinu «atrymać poŭny kantrol nad novym parłamientam» za try hady da zakančeńnia jaho prezidenckich paŭnamoctvaŭ, kaža adna z krynic, na fonie padzieńnia rejtynhaŭ partyi ŭłady.
Dźvie blizkija da Kramla krynicy i zakanadaviec z «Adzinaj Rasii» taksama skazali ahienctvu, što hetyja pieramieny dazvolać Uładzimiru Pucinu zastacca va ŭładzie paśla 2024 hoda, «utrymlivajučy ŭładu jak kiraŭnik kirujučaj partyi i jak premjer-ministr z pašyranymi kanstytucyjnymi paŭnamoctvami na škodu prezidenckim».
U kancy sakavika ahienctva pisała pra inšy scenar z zachavańniem Pucina va ŭładzie paśla 2024 hoda: abjadnańnie Rasii i Biełarusi.
Adnak ciapier ahienctva hety varyjant ličyć nieaktualnym.
«Namahańni, nakiravanyja na toje, kab pierakanać lidara susiedniaj Biełarusi ŭ patencyjnym źlićci z Rasijaj, jakoje dazvoliła b Pucinu stać kiraŭnikom abjadnanaj dziaržavy, paciarpieli niaŭdaču»,
— piša Bloomberg.
Kazachstanski varyjant u Rasii taksama vyhladaje nierealistyčnym, pakolki novy prezident moža kinuć vyklik Pucinu.
