13 lipienia ŭ asipovickim mikrarajonie Čaromuški znajšli dva trupy. Siarhieju Łuckinu, starejšamu, było 49 hadoŭ, jaho plamieńniku Antonu Rubinu — 26.
Kažuć, što mužčyn zastrelili.
Paźniej stała viadoma, što zatrymali padazravanaha — miascovaha žychara Ramana Paŭluka. Jon vypivaŭ toj nočču razam ź Siarhiejem i Antonam.
Ale Śledčy kamitet zajaviŭ, što padazravanych dvoje.
«Naša Niva» daviedałasia, chto druhi padazravany ŭ kryvavym zabojstvie. Heta miascovy žychar Viktar K.
Kaliści Viktar byŭ žanaty ź miascovaj žycharkaj Natallaj, u ich navat jość ahulnyja dzieci. Ale paźniej para razyšłasia. Zatym Natalla pačała žyć razam z Antonam Rubinym.
Spačatku Anton i Viktar stavilisia adzin da adnaho niehatyŭna, svarylisia. Ale, kažuć, apošnim časam nijakich kanfliktaŭ pamiž mužčynami nie było. Raskazvajuć, što Viktar navat zabiraŭ na vychodnyja nie tolki svaich dziaciej, ale i dzicia jaho byłoj žonki i Antona.
Jak raspaviali «Našaj Nivie» znajomyja siamji zahinułych, padziei ŭ trahičnuju noč na 13 lipienia razhortvalisia nastupnym čynam. U domie Siarhieja Łuckina vypivali. Byŭ sam Łuckin, jaho plamieńniki Anton i Maksim Rubiny, ich siabar Raman Paŭluk.
Paśla Maksim i Raman pajšli ŭ kramu pa ałkahol. Siarhiej i Anton zastalisia doma.
Z kramy Maksim i Raman nakiravalisia ŭ kvateru Paŭluka. Tam jašče pasiadzieli, paśla Maksim Rubin pajšoŭ dachaty.
Ranicaj jon pryjšoŭ da dziadźki i znajšoŭ tam zabitym i samoha Siarhieja, i svajho brata Antona.
Paśla pad vartu ŭziali Ramana Paŭluka i Viktara K.
Praŭda, navat svajaki zabitych nie vierać, što Raman i Viktar majuć dačynieńnie da zabojstva. Viadoma, što Raman, naprykład, vielmi dobra viedaŭ siamju Antona Rubina, daŭno siabravaŭ i ź im, i ź jaho bratam Maksimam.
Śledčy kamitet paviedamiŭ, što pa fakcie zabojstva zaviedzienaja kryminalnaja sprava. Pakarańnie złačyncam pahražaje vielmi žorstkaje: 25 hadoŭ, pažyćciovaje ci ŭvohule rasstreł.
Jakoje dačynieńnie da zabojstva majuć zatrymanyja, pakul vyśviatlajecca.
«Pravodziacca nieabchodnyja śledčyja dziejańni, skiravanyja na vyznačeńnie dačynieńnia dadzienych asob da ździejśnienaha złačynstva», — paviedamili śledčyja.