Alaksandr Łukašenka 29 lipienia pryznačyŭ Hienadzia Sałaŭja staršynioj Homielskaha abłvykankama. Heta pasada była vakantnaj bolš za try miesiacy, kali Uładzimir Dvornik pajšoŭ na pavyšeńnie i staŭ vice-premjeram pa sielskaj haspadarcy.
Apošni hod Hienadź Sałaviej źjaŭlaŭsia pieršym namieśnikam Dvornika, tamu ničoha niečakanaha ŭ hetym pryznačeńni niama. Pra novaha kiraŭnika Homielščyny zusim mała infarmacyi, tamu pasprabujem zapoŭnić hetyja łakuny.
Rodam nie z Navahrudka, a ź Niaśviža
U aficyjnaj bijahrafii Hienadź Sałaŭja napisana, što jon naradziŭsia ŭ vioscy Tupały Navahrudskaha rajona ŭ 1963 hodzie. Nasamreč takoj vioski navat nie isnuje. Jość Vialikija i Małyja Tupały, ale znachodziacca jany ŭ susiednim Karelickim rajonie. Adtul pachodziła mama čynoŭnika.
Kali chłopcu nie było jašče i hoda, siamja pierabrałasia na radzimu baćki ŭ Niaśvižski rajon, u viosku Kačanovičy. Heta pasielišča znachodzicca ŭsiaho za try z pałovaj kiłamietry ad Niaśviža, tamu ŭ škołu Hienadź Michajłavič chadziŭ u rajcentr. Jon skončyŭ vosiem kłasaŭ SŠ №3 Niaśviža, a paśla pajechaŭ vučycca ŭ Śmiłavicki sielskahaspadarčy technikum.
Z šmatdzietnaj siamji
Baćki staršyni Homielskaha abłvykankama ŭžo pamierli. Jany aboje pracavali na kałhasnaj fiermie. Mama była dajarkaj, tata — žyviołavodam. Prostaja viaskovaja siamja. Zrazumiełaja sprava, što ad dziacinstva Hienadź Sałaviej byŭ pryvučany da fizičnaj pracy. Mabyć, heta i abumoviła vybar prafiesii.
Sałaviej pachodzić z šmatdzietnaj siamji. U baćkoŭ było piaciora dziaciej. Dakładna viadoma, što siastra Valancina praciahvaje žyć u rodnych Kačanovičach. Niedaloka žyvie i siastra Tamara — u vioscy Lavonavičy (darečy, heta radzima paeta Siarhieja Novika-Piejuna). A voś brat spadara Hienadzia ŭžo pamior.
Paśla skančeńnia technikuma Sałaviej pajšoŭ pracavać zaatechnikam u kałhas imia Lenina, paśla ŭ haspadarku «Łań-Niaśviž». Tak havorycca ŭ bijahrafii, ale niachaj jana nie ŭvodzić u zman. Sprava ŭ tym, što heta adna i taja ž haspadarka, jakaja prosta była pierajmienavanaja. Łań, siońnia ahraharadok, znachodzicca za siem kiłamietraŭ ad Kačanovič.
Zarekamiendavaŭ siabie ŭ Klecku
Na praciahu šaści hadoŭ (2012—2018) Hienadź Sałaviej uznačalvaŭ Klecki rajvykankam. «Kali čałaviek starajecca, to i ziamla nie lanujecca», — faktyčna hetyja słovy byli devizam jahonaj pracy.
Svajoj metaj jon dekłaravaŭ: «Zrabić Klecki rajon kamfortnym dla žyćcia. Chočam, kab jon ciešyŭ ziemlakoŭ i ździŭlaŭ pryjezdžych, kab kožny raz jany znachodzili tut niešta novaje i cikavaje. Kab dahledžanyja siadziby na dobraŭparadkavanych vulicach, sučasnyja balnica i škoły, bahaćcie kvietak i zielaniny letam i mnostva roznakalarovych ahnioŭ vosieńniu i zimoj samim faktam svajoj najaŭnaści paćviardžali, što tut žyvuć sapraŭdnyja haspadary».
Mienavita z Klecka jaho zabrali na niadoŭhi čas pakiravać Niaśvižskim rajonam. A Niaśvižski rajon — viadomaja kuźnia kadraŭ. Naprykład, staršynioj rajvykankama byŭ eks-vice-premjer Uładzimir Dražyn (tak, toj samy, jaki pisaŭ, što «babła mała, miersedesaŭ niama»), a taksama eks-staršynia Minskaha abłvykankama Leanid Krupiec.
Žonka nie pajechała ŭ Homiel
Halina Sałaviej (sprava). Fota Niaśvižskija naviny.
Bolš za dvaccać hadoŭ svajho pracoŭnaha stažu Sałaviej jakraz i addaŭ haspadarcy ŭ Łani. Byŭ tam staršynioj. Miascovyja ludzi, ź jakimi my razmaŭlali, stanoŭča adhukajucca ab jahonaj pracy. Niaśvižski rajon słavicca svajo uradlivaj ziamloj, i haspadarka pakazvała pry Sałaŭju vydatnyja vyniki.
Cikava, što ŭ «Łań-Niaśviž» praciahvaje pracavać žonka staršyni abłvykankama Halina Sałaviej, jana ŭznačalvaje miascovy prafsajuz. Žančyna pa-raniejšamu žyvie ŭ Łani. U Homiel z mužam jana nie pajechała.
«U vioscy ŭ nas dom, pabudavany svaimi rukami, dvaccać piać sotak harodu, haspadarka, usio heta treba hladzieć, nie ŭsio tak prosta», — patłumačyła «NN» spadarynia Halina.
«Spadziavałasia, što vierniecca, — praciahvaje žonka čynoŭnika. — Kali ščyra skazać, to ja rada za jaho, bo jon usiaho dabiŭsia sam. Ale bolš by chacieła, kab jon viarnuŭsia siudy nazad».
U volny ad pracy čas Halina Stanisłavaŭna doma vyroščvaje archidei.
Paznajomilisia Sałaŭi padčas sumiesnaj vučoby ŭ sielskahaspadarčaj Akademii ŭ Horkach.
Dačka pracuje vizažystkaj
Daryna Sałaviej. Fota vk.com.
U siamji dźvie dački — Julija i Daryna. Abiedźvie žyvuć u Minsku.
Daryna pracuje vizažystam, na jaje staroncy Ukantakcie napisana, što vykonvaje pasłuhi ŭ Minsku, Niaśvižy i Klecku.
«Ja dypłamavany vizažyst 4 razradu i stylist. Skončyła aŭtarski kurs vizaž Darji Brylovaj «MakeupProfi». Pavyšeńnie kvalifikacyi pa makijažy ŭ Volhi Piakarski. Naviedvaju šmatlikija majstar-kłasy viadomych vizažystaŭ. Skončyła kurs pa pryčoskach ŭ Dyjany Hołub «Trendavyja pryčoski». Vypusknica doma prafiesijnaj pryhažości «Akademija stylu». Vykonvaju pryčoski luboj składanaści. Pracuju ź jakasnaj prafiesijnaj kaśmietykaj», — tak jana pradstaŭlaje siabie ŭ internecie. Darynie 24 hady.
Julija Sałaviej. Fota facebook.com.
Starejšaj dačce Julii 30 hadoŭ. Viadoma, što jana skončyła BDU ŭ 2012 hodzie. Abiedźvie dački šmat padarožničajuć pa śviecie.
