Śpikier Siejma Polščy Marek Kuchcinski zajaviŭ, što sychodzić u adstaŭku z-za skandału vakoł kolkaści «siamiejnych» pieralotaŭ uradavymi samalotami.
«Zaŭtra ja pakinu pasadu śpikiera Siejma. Ja nie parušaŭ zakonu, a supiarečlivaja kolkaść rejsaŭ źviazana ź vialikaj kolkaściu sustreč z žycharami, časta ŭ nievialikich haradach», — zajaviŭ Kuchcinski.
Śpikiera parłamienta Polščy abvinavačvajuć u tym, što jon vykarystaŭ uradavyja samaloty dla pryvatnych pajezdak členaŭ svajoj siamji.
Z sakavika 2018 da lipienia 2019 hoda Kuchcinski časta lotaŭ uradavymi samalotami pamiž Varšavaj, dzie jon pracuje, i Žešuvam, horadam na paŭdniovym uschodzie Polščy, dzie jon žyvie.
Harady znachodziacca na adlehłaści 320 kiłamietraŭ i złučanyja rejsami nie mienš za try razy na dzień. Košt rejsaŭ ahułam skłaŭ 4 miljony złotych (928 tysiač jeŭra).
