Samaja rezanansnaja historyja apošnich dzion — abvinavačvańni na adras milicyi ŭ źbićci 36-hadovaha hrodzienca Dzianisa Łukjanava, baćki traich dziaciej, jaki byŭ zatrymany ŭ stanie mocnaha ałkaholnaha apjanieńnia.
20 lipienia jon naviedaŭ aŭtafiestyval SunDay.
U hrodzienskim telehram-kanale «Źlivy» źjaviłasia videa, na jakim, jak miarkujecca, aholeny Dzianis Łukjanaŭ kačajecca pierad scenaj.
Jość dźvie viersii nakont taho, što adbyvałasia dalej.
Stryječnaja siastra Dzianisa raskazvaje, što pa darozie ŭ vyćviareźnik AMAP vyvieŭ Łukjanava ŭ lesie i «adpracoŭvaŭ na im udary» pa nahach, ale śladoŭ ad hetaha nie zastałosia. U vyniku, kaža siastra, praz dva tydni jon trapiŭ u balnicu z admirańniem ciahlic na nazie i ciapier u krytyčnym stanie lažyć u reanimacyi — u jaho pakrysie admirajuć miakkija tkanki.
Milicyja pierakonvaje, što ŭ razmovie z rabotnikami Upraŭleńnia ŭłasnaj biaśpieki MUS Dzianis patłumačyŭ: traŭmu atrymaŭ praz 11 dzion paśla fiestyvalu praz «nieaściarožnaść u stanie ałkaholnaha apjanieńnia», a z amapaŭcami jon uvohule spravaŭ nijakich nie mieŭ.
Pravaachoŭniki taksama apublikavali videa, jak na nastupny dzień paśla zatrymańnia Dzianis upeŭnienaj chadoj vychodzić z vyćviareźnika.
Žonka Dzianisa, Julija, jakaja padpisała list sa skarhaj na dziejańni supracoŭnikaŭ AMAP u prakuraturu i SK, admaŭlajecca štości tłumačyć.
«Ja nie kamientuju situacyju, a ŭsio, što viedaju, raskazała śledčamu», — skazała jana karespandentu «Našaj Nivy».
Dzianis (u centry) na siamiejnym pikniku ź dziećmi. Fota Vk.com
Miedyki, jakija pračytali apisańnie paškodžańniaŭ Dzianisa — niekroz ciahlicaŭ i zaražeńnie kryvi, — vykazali zdahadku, što razmova moža iści pra tak zvany «sindrom praciahłaha ściskańnia»
Bolš detalova pra sindrom «Našaj Nivie» raskazaŭ kandydat miedycynskich navuk, zahadčyk kafiedry dziciačaj reanimatałohii i aniestezijałohii BiełMAPA Leanid Mironaŭ. Jon maje bolš čym 40-hadovy dośvied pracy ŭ taksikałohii: spačatku ŭ adździaleńni taksikałohii Balnicy chutkaj dapamohi Minska, a paśla ŭ adździaleńni intensiŭnaj terapii chvorych z vostraj nyrkavaj niedastatkovaściu.
Udakładnim, što jon raskazvaŭ pra sindrom ściskańnia ŭ cełym, biezadnosna da kankretnaj historyi Dzianisa Łukjanava.
Leanid Mironaŭ
«Isnuje sindrom pazicyjnaha ściskańnia — heta kali čałaviek doŭhi čas — bolš za čatyry hadziny, — lažyć u adnym stanoviščy i na niejkija kancaviny ci ŭčastki ciśnie vaha ŭsiaho cieła.
Praz 5—6 hadzin parušajecca kryvatok i, paśla taho, jak čałaviek pračnuŭsia ci jaho pieraviarnuli, u tym miescy pačynaje raźvivacca aciok, a ŭ zakranutych ciahlicach — niekroz. Pradukty raspadu traplajuć u kroŭ i, u pieršuju čarhu, paražajucca nyrki. Heta ŭ ahulnych rysach. Na svajoj praktycy ja asabista bačyŭ niekalki sotniaŭ takich pacyjentaŭ», — raskazvaje doktar.
«Pa maim dośviedzie, asnoŭnaja pryčyna takich situacyj — ałkahol i jaho surahaty. Ludzi pierabrali — i ich adklučyła. Nu i byvaje inšaje, što ciahnie stratu prytomnaści, — parušeńnie mazhavoha kravatoku, naprykład.
Na miakkim łožku takoje redka byvaje. U asnoŭnym heta zdarajecca na žorstkaj pavierchni: ziamla, asfalt, padłoha. Čałaviek loh, a ruka pad im, abo ŭ vypadkovaj pozie ŭpaŭ — naha pad im, niazručnaje stanovišča.
U mianie byŭ pacyjent, jaki siedziačy na padłozie la batarei praspaŭ noč pjany i atrymaŭ niekroz jahadzičnych ciahlic. Kašmarnaje vidovišča…
Uvohule, arhanizm patrabuje, kab my pieryjadyčna pieravaročvalisia ŭ śnie — kab kryvatok u tych častkach cieła, jakija my ciśniem svajoj masaj, adnaviŭsia. I my krucimsia ŭ łožku nočču, navat nie adčuvajučy taho. A čałaviek u kamatoznym stanie, kaniečnie, takoha nie robić. Paśla prabudžeńnia čałaviek adčuvaje niešta nie toje — pačynaje aciakać paškodžanaja častka cieła, za košt hetaha i zaciskańnia niervovych stvałoŭ paźniej uźnikaje bol, kancaviny admaŭlajucca pracavać».
Jakaja dapamoha akazvajecca takim ludziam?
«Oj, heta vielmi ciažkaja patałohija. Naša zadača tut navat nie ratavać ciahlicy ŭ pieršuju čarhu, a papiaredzić paškodžańni nyrak. Z tkanak ža vymyvajecca mijahłabin — heta złučeńnie, jakoje nahadvaje hiemahłabin, ale znachodzicca ŭ ciahlicach. Traplajučy ŭ kryvatok, jon źjaŭlajecca mocnym akiślalnikam, škodzić kletkam. A ŭ nyrkach jon vyklikaje błakadu nyrkavych kanalcaŭ — jany pierastajuć vydzialać maču.
Takija ludzi ŭ asnoŭnym traplajuć u reanimacyju. Im patrabujecca intensiŭnaja terapija, zalivajucca vialikija abjomy rastvoraŭ. Kali raścisnuć padčas kamatoznaha snu svaju nahu, to ŭ joj pačynaje raźvivacca aciok, i ŭ hetaj nazie źbirajecca da 10 litraŭ vady! A abjom kryvi ŭsiaho 5—6 litraŭ. U takoha čałavieka ahromnisty deficyt vadkaści».
Pavodle doktara, na jahonaj praktycy vyratavać nie atrymlivałasia prykładna kožnaha dziasiataha.
«Ale paśla taho, jak papraviŭsia, u ich ruki-nohi ŭžo atrafiravanyja. Heta prosta kostki, abciahnutyja skuraj, a nie funkcyjanalnaja kancavina. A byvaje i tak, što škodziać nie ciahlicy, a tolki nierv. Naprykład, ruka lahła na niešta ćviordaje i vostraje — śpinku stuła. Ciahlicy nie pacierpiać, a nierv za hety čas adamre i ruka pierastanie pracavać», — padsumavaŭ jon.
Kali u Łukjanava dyjahnastavany mienavita hety sindrom, zastajecca niezrazumiełym, pry jakich abstavinach jon moh atrymać jaho praź niekalki dzion paśla vyzvaleńnia — prajaśnić hetaje pytańnie moža abo jon sam, abo ludzi, jakija byli pobač ź im u dni pierad dyjahnastavańniem traŭmy. Ale jany maŭčać.
