Režysior i apieratar dakumientalnaha kino Mikałaj Kupryč kaža, što ŭ noč na 25 žniŭnia na Kastryčnickaj jaho źbiŭ nieviadomy, bo Mikałaj byŭ u ŁHBT-kampanii. Mikałaj atrymaŭ čerapna-mazhavuju traŭmu, u jaho złamany nos i bujnyja hiematomy. Jon u špitali, piša Radyjo Svaboda.
Kampanija, u jakoj byŭ Mikałaj, baviła čas niedaloka ad AZS na barnaj vulicy Kastryčnickaj. Nieviadomy padyšoŭ sam.
«Jon padychodzić i pytaje: «Ty taksama p…r?» — uspaminaje Mikałaj. — Ja kažu: «Jakaja tabie roźnica, p…r ja ci nie?» — «Nie, ty skažy kankretna: p…r ty ci nie?» Ja kažu: «Ja ž nie padychodžu da ciabie i nie pytaju, naturał ty ci nie? Hamafob ty, nie hamafob? Mianie heta nie cikavić». Paśla jon jašče raz pierapytvaje: «Skažy kankretna!» Ja kažu: «Nu dobra, niachaj ja budu p….m, OK, i što dalej?»»
Pa słovach Mikałaja, vidavočnaj ahresii chłopiec nie prajaŭlaŭ, uśmichaŭsia. Mikałaj kaža, što jon hieteraseksuał, ale padtrymlivaje ŁHBT-supolnaść, tamu adkazaŭ mienavita tak.
«Jon nie najaždžaŭ, skazaŭ: «Dobra, ja zrazumieŭ», — praciahvaje Mikałaj. — Ja razvaročvajusia i adychodžu, siekundaŭ piać prachodzić, i jon mnie sa śpiny, vidać, z dobraha takoha razmachu, bje akurat u skroń. Ja adklučajusia i padaju tvaram na asfalt».
Ad udaru Mikałaj atrymaŭ čerapna-mazhavuju traŭmu, u jaho pałamany nos i bujnyja hiematomy. Pierad hetym nieviadomy chłopiec užo ŭdaryŭ dvuch siabroŭ Mikałaja.
Adzin ź ich, Arciom Skapcoŭ, paćviardžaje słovy Mikałaja i kaža, što atrymaŭ udar u šyju. Nieviadomy taksama raźbiŭ skułu druhomu maładomu čałavieku. Paśla hetaha chłopcy na niejki čas adyšli za parkoŭku. Kali viarnulisia, pabačyli jašče bolš źbitaha siabra.
«Ja padbieh i ŭbačyŭ Kolu, jon byŭ na karačkach, uvieś u kryvi, — kaža Arciom. — Hetaha čałavieka ŭžo nie było vidać nidzie. Kolu pryviali krychu ŭ paradak, spačatku dumali, što jon narmalna, ale pa vyniku jon vyklikaŭ i milicyju, i chutkuju».
Arciom kaža, što padčas razmovy ź nieviadomym dumaŭ, što heta šarahovaja situacyja słoŭnaha kanfliktu. Raniej jaho nikoli nie źbivali.
Mikałaj Kupryč napisaŭ zajavu ŭ milicyju. U niadzielu, 25 žniŭnia, jaho apytvaŭ milicyjant.
Aficyjnaja pradstaŭnica Śledčaha kamiteta Kaciaryna Harlinskaja skazała Svabodzie, što ciapier śledčyja pravodziać pravierku i vyśviatlajuć akaličnaści zdareńnia. Pryznačyli sudova-miedycynskuju ekspertyzu dla vyznačeńnia ciažkaści cialesnych paškodžańniaŭ.
«Leninski RASK pravodzić pravierku pa zajavie 30-hadovaha mužčyny ab pryciahnieńni da adkaznaści nieviadomaha, jaki ŭ noč z 24 na 25 žniŭnia adzin raz udaryŭ jaho ŭ tvar na aŭtazapraŭcy ŭ Minsku», — skazała Harlinskaja.
U mai 2014 hoda na vychadzie z hiej-viečaryny byŭ žorstka źbity Michaił Piščeŭski. Jon pieranios apieracyju vydaleńnia častki mozhu i pamior u špitali bolš jak praz hod paśla praciahłaj komy.
