Pavieł Juchnievič z žonkaj Ramualdaj. Fota Andrej Davydčyk.
35-hadovy Pavieł Juchnievič na svajoj staroncy ŭ fejsbuku abvieściŭ pra rašeńnie ŭdzielničać u parłamienckaj kampanii ŭ jakaści kandydata ŭ deputaty.
Jon budzie bałatavacca pa 102-j Kamiennahorskaj vybarčaj akruzie. Juchnievič u svoj čas byŭ adnym ź lidaraŭ moładzievaha ruchu «Zubr», potym supracoŭničaŭ z «Jeŭrapiejskaj Biełaruśsiu». Apošnija hady Pavieł całkam adyšoŭ ad publičnaj palityki i zaniaŭsia aŭtabiznesam. Navošta jamu iści ŭ deputaty? Pra heta Juchnievič adkazaŭ u intervju «Našaj Nivie».
«Naša Niva»: Čamu vy vyrašyli ŭdzielničać u jakaści kandydata na hetych vybarach?
Pavieł Juchnievič: Čas vymahaje dziejańniaŭ. A ludziej, hatovych da dziejańniaŭ, krytyčna mała. Kali b ja bačyŭ, što ludziej, jakija aktyŭna biaruć inicyjatyvu pa abaronie niezaležnaści, dastatkova, to ja b pracavaŭ u zvykłym dla siabie farmacie niepubličnaj dapamohi. Tak ja rabiŭ, naprykład, u situacyi z aryštavanym u Rasii Kiryłam Silivončykam. Ja nie amatar publičnaści, ale jaje vymahaje situacyja.
Ja ščyra čakaŭ niehatyŭnaj reakcyi na svajo rašeńnie, ale pryjemna ździŭleny toj padtrymkaj, jakuju mnie akazvajuć. Ludzi telefanujuć, pišuć. Niekalki čałaviek skazali, što hatovyja ŭvajści ŭ inicyjatyŭnuju hrupu, inšyja prapanavali jurydyčnuju dapamohu.
«NN»: Źmicier Daškievič kaža, što ŭ krainie stolki ŭsialakaj cikavaj pracy — tolki rabi, i zusim nie abaviazkova dziela hetaha iści ŭ deputaty.
PIU: Možna, kaniečnie, jak Pavieł Biełavus zarablać hrošy na niečym biełaruskim — heta fajna. Daškievič zarablaje hrošy na mebli — vydatnaja sprava. Baronić Kurapaty. Možna rabić šmat čaho, ale ja rablu, što ŭmieju, da čaho ŭ mianie jość žadańnie i dośvied.
Fota Andrej Davydčyk.
«NN»: Ci budziecie vy vyłučacca ad niejkaj palityčnaj siły?
PIU: Nie. Umoŭny Labiedźka skazaŭ by, što heta šyrokaja kaalicyja. Ale nie, heta roznyja ludzi, jakija pradstaŭlajuć «Jeŭrapiejskuju kaalicyju», byłyja zasnavalniki «Zubra», błohier. Heta hrupa ludziej, ale my nie idziom ad niejkaj arhanizacyi. U mianie pytajucca: «Ty idzieš na vybary ad «Jeŭrapiejskaj Biełarusi»?» Nie. Ja vielmi daŭno ŭžo nie maju nijakaha dačynieńnia da «Jeŭrapiejskaj Biełarusi». Ad BNK? Nie. Heta raznastajnaje koła ludziej, my idziom na vybary, padtrymlivajučy adzin adnaho, ale my nie atajasamlivajem siabie ź niejkaj apazicyjnaj strukturaj. U nas prosta supolnyja intaresy i zadačy, a mienavita — abarona niezaležnaści Biełarusi. Mahčymaściaŭ lehalnaj pracy pa sutnaści ŭžo niama, aproč vybaraŭ, heta nie 2001 hod, i navat nie 2006.
«NN»: Ci možacie nazvać kankretna ludziej, jakija jašče vyłučajucca razam z vami?
PIU: Naprykład, Jaŭhien Afnahiel. Ja viedaju, što budzie vyłučacca Maksim Viniarski, Aleś Krutkin. Možna nas nazvać «lehiendy supracivu» (śmiajecca) ci byłyja «zubry», chacia byłych nie byvaje. Imiony mnohich hetych ludziej kažuć bolej, čym luby brend. U sučasnym śviecie ludzi nie vierać brendam, jany vierać asobam.
«NN»: Što vy asabista hatovyja prapanavać svaim vybarcam?
PIU: Ja hatovy prapanavać abaronu niezaležnaści. Cisnuć na ŭładu, mianiać situacyju, kab u nas była bolš uciamnaja pierśpiektyva. Pa sutnaści, zhurtavać vakoł siabie nacyjanalistaŭ, patryjotaŭ. Nie istotna pad jakimi ściahami. Ja nie budu kazać niešta pra ekanamičnyja rečy (chaj hetym zajmajucca ekanamisty), ja idu na vybary, kab pieradusim baranić niezaležnaść Biełarusi.
«NN»: Vy ličycie, jość niejkija ŭmovy, pry jakich vy staniecie deputatam parłamienta?
PIU: Ja dumaju, što jość. Jarkaja, mocnaja kampanija — heta dobraja ŭmova. Zadača numar 1 nie jość atrymać kresła ŭ parłamiencie. Naša zadača bolš hruntoŭnaja i doŭhaterminovaja. Ciapier dobraja mahčymaść jaje pačać vykonvać. Naturalna, jość šmat razvahaŭ, kaho voźmuć u parłamient, kaho nie. Ja nie chaču ŭ hetych razvahach udzielničać, u «Zubra» kaliści była nalepka z tekstam: «Treba prosta rabić svaju spravu». I ja jaje prosta rablu. Ja ŭpeŭnieny ŭ tych, chto pobač sa mnoj. Ja ŭpeŭnieny, što da kampanii dałučycca niechta jašče. Tak zaŭsiody było. Praca nie spynicca i paśla vybaraŭ.
Pavieł Juchnievič razam z dačkoj Jevaj.
«NN»: Času nie škada?
PIU: Nie, choć jaho i nie šmat. U mianie byŭ pierapynak u aktyŭnaj publičnaj pracy i palitycy, ciapier jon skončyŭsia. I ja rablu ŭsio heta ź vialikim zadavalnieńniem.
