Urahan «Daryjan», jaki sfarmavaŭsia ŭ Atłantyčnym akijanie i ŭ apošnija dni niekalki asłabieŭ, da treciaj stupieni ź piaci mahčymych, pa škale Safira - Simpsana, jon praciahvaje nabližacca da ŭźbiarežža ZŠA, paviedamlaje tass.ru sa spasyłkaj na Nacyjanalny centr pa nazirańni za ŭrahanami ZŠA.
Pavodle apublikavanych centram źviestak, maksimalnaja chutkaść vietru ŭ miežach atmaśfiernaj źjavy pieravyšaje 51 m/s. Jana, vierahodna, pačnie źnižacca prykładna praz 12 hadzin.
Urahan znachodzicca za 170 km na poŭdzień ad horada Čarłston (štat Paŭdniovaja Karalina) i ruchajecca ŭ paŭnočnym kirunku z chutkaściu 3 m/s. Jak čakajecca, jon nablizicca da ŭźbiarežža Paŭdniovaj Karaliny na praciahu bližejšych niekalkich hadzin. Dalej jon budzie pieramiaščacca ŭ bok Paŭnočnaj Karaliny. Pavodle adznak centra, u bližejšyja niekalki dzion u štatach Džordžyja, Paŭdniovaja i Paŭnočnaja Karalina čakajucca pavodki ŭ prybiarežnych rajonach, a taksama bury.
Kala 2 młn čałaviek, jakija pražyvajuć na atłantyčnym uźbiarežžy ZŠA, nieabchodnaja evakuacyja ŭ suviazi z nabližeńniem «Daryjana». Amierykanskija telekanały tranślujuć kadry, na jakich bačna, jak žychary prybiarežnych rajonaŭ rychtujucca da mahčymaha ŭdaru stychii. Jany, u pryvatnaści, aktyŭna zapasajucca charčavańniem i haručym, a taksama zabivajuć vokny.
Na Bahamskich vyspach, pavodle apošnich źviestak, z-za ŭrahanu zahinuli nie mienš za 20 čałaviek. Aficyjnyja asoby adznačajuć, što, chutčej za ŭsio, kolkaść achviar uzraście. Kala 13 tys. budynkaŭ paškodžany abo razburany. Zatoplenyja vialikija terytoryi.
