16 vieraśnia ŭ Bresckim abłasnym sudzie abviaścili prysud 67-hadovamu žycharu Łuninca, jaki abvinavačvaŭsia ŭ zabojstvie cieščy, žonki i jaje brata, piša Tut.by.
Sud pryznaŭ mužčynu vinavatym u trajnym zabojstvie i niezakonnych dziejańniach u dačynieńni da ahniastrelnaj zbroi. Jamu pryznačyli 25 hadoŭ pazbaŭleńnia voli ŭ kałonii ŭzmocnienaha režymu (heta maksimum dla piensijanieraŭ). Akramia taho sud abaviazaŭ jaho pakryć 25 tysiač rubloŭ kampiensacyi maralnaj škody paciarpiełaj — siastry zabitaj žančyny.
Prysud nie ŭstupiŭ u zakonnuju siłu i moža być abskardžany.
Złačynstva mužčyna ździejśniŭ 8 sakavika hetaha hoda. Za niekalki dzion da hetaha jon pasvaryŭsia z 56-hadovaj žonkaj Halinaj. Žančyna syšła ź ich kvatery ŭ Łunincy i źjechała da mamy ŭ viosku Aziarnica. 8 sakavika pa jaje pryjechaŭ abvinavačany. Pamiž im i svajakami žonki adbyŭsia kanflikt — i Vasil adkryŭ stralbu. Pažyłaja haspadynia doma zahinuła paśla pieršaha strełu, Halina i jaje brat vybiehli z chaty na vulicu.
Abvinavačany pahnaŭsia za imi i staŭ stralać u dvary doma. Halina pamierła ad nie mienš čym dvuch ahniastrelnych ranieńniaŭ, jaje brat — ad čatyroch. Paśla hetaha mužčyna streliŭ z strelby sabie ŭ hałavu. I vyžyŭ.
Strałka spačatku advieźli ŭ Łuninieckuju CRB, a na nastupny dzień pieravieźli ŭ vajenny špital u Minsku. Doŭhi čas jon znachodziŭsia pad nahladam daktaroŭ.
Na pieršym sudovym pasiadžeńni abvinavačany pryznaŭ svaju vinu.
Žonka syšła ad jaho, jon pajechaŭ raźbiracca — što viadoma pra trajnoje zabojstva pad Łunincom, jakoje zdaryłasia 8 sakavika
