Narviežski nobieleŭski kamitet nazavie ŭ piatnicu ŭ Osła łaŭreata Nobieleŭskaj premii miru za 2019 hod, piša tass.ru. U 2018 h. uznaharodu atrymali chirurh Deni Mukviehie z Demakratyčnaj Respubliki Konha i pravaabaronca ź Iraka, byłaja nałožnica terarystaŭ z hrupoŭki «Isłamskaja dziaržava» Nadzia Murad «za namahańni pa spynieńni vykarystańnia seksualnaha hvałtu ŭ jakaści zbroi vajny i ŭzbrojenych kanfliktaŭ i za toje, što jany mužna zmahalisia z vajennymi złačynstvami i damahalisia spraviadlivaści dla ich achviar».
Premija miru, pavodle zaviaščańnia Alfreda Nobiela vučonaha, prysudžajecca «asobie, što dabiłasia najbolšych pośpiechaŭ, albo tamu, chto zrabiŭ bolš za inšych u spravie zhurtavańnia narodaŭ i skaračeńnia kolkaści dziejučych armij, a taksama za praviadzieńnie mirnych kanhresaŭ i pryciahnieńnie da ich uvahi».
U hetym hodzie na premiju miru pretendujuć 219 čałaviek i 85 arhanizacyj. Poŭny śpis kandydataŭ trymajecca ŭ strohim sakrecie.
Kiraŭnik narviežskaha Instytuta daśledavańnia prablem miru Chienryk Urdal, jaki kožny hod składaje śpis mahčymych pretendentaŭ, ličyć vierahodnym, što ŭznaharoda budzie prysudžana moładzievym aktyvistkam Ilvad Elman z Samali i Chadžer Šaryf ź Livii, a taksama aktyvistu z Hankonha Natanu Łau. Dalej u jaho prahnozie — mižnarodnaja arhanizacyja «Reparciory bieź miežaŭ», Kampanija pa baraćbie za kantralavany handal zbrojaj (Control Arms Coalition), Mižnarodny kamitet vyratavańnia (IRC) i premjer-ministr Efiopii Abij Achmied.
Pavodle infarmacyi z adkrytych krynic, na premiju miru ŭ hetym hodzie byli vyłučanyja niekalki starych favarytaŭ. Čaćviorty hod zapar u liku kandydataŭ budzie prezident ZŠA Donald Tramp, jaho vysunuŭ premjer-ministr Japonii Sindzo Abe. Šviedskaja 16-hadovaja aktyvistka Hreta Tunbierh, jakaja ź vieraśnia minułaha hoda abviaściła siabie lidaram ahulnasuśvietnaha ruchu padletkaŭ «školnaja zabastoŭka za klimat», naminavanaja na Nobieleŭskuju premiju miru dvuma šviedskimi i dvuma narviežskimi palitykami.
Niekalki hadoŭ na vysokuju ŭznaharodu pretenduje Arktyčny saviet — mižuradavy forum vysokaha ŭzroŭniu, členami jakoha źjaŭlajucca vosiem dziaržaŭ palarnaha rehijonu. Na premiju ŭžo nie pieršy hod pretendujuć eks-supracoŭnik śpiecsłužbaŭ ZŠA Edvard Snouden i Upraŭleńnie viarchoŭnaha kamisara AAN pa spravach biežancaŭ, jakomu premiju miru prysudžali ŭžo dvojčy — ŭ 1954 i 1981 hadach.
Bukmiekierskija internet-sajty prymajuć staŭki na imiony łaŭreataŭ. U vierchnich radkach śpisu — Hreta Tunbierh, Abij Achmied, pravadyr amazonskich indziejcaŭ kajapa Raonie Mietuktyre i premjer-ministr Novaj Ziełandyi Džasinda Ardern, Upraŭleńnie viarchoŭnaha kamisara AAN pa spravach biežancaŭ.
Nobieleŭski tydzień startavała 7 kastryčnika. Užo stali viadomyja imiony łaŭreataŭ premij pa fizicy, chimii, miedycynie, litaratury.
