Šeście pa centru Bieraścia. Fota: Iryna Arachoŭskaja/«Biełsat»
Alaksandr Łukašenka padčas sustrečy sa studentami i vykładčykami Akademii kiravańnia 18 kastryčnika raskrytykavaŭ praciŭnikaŭ budaŭnictva akumulatarnaha zavodu ŭ Bieraści, jakija vyłučalisia kandydatami ŭ deputaty. Jahony vystup pakazaŭ telekanał «Biełaruś 1».
Alaksandr Łukašenka adznačyŭ, što chacieŭ by, kab moładź «bolš aktyŭna siabie vyjaŭlała», «ale hvałtam nie kryčała», jak u Bieraści.
«Ja ž papiaredžvaŭ, kali ŭ vas byŭ na 1000-hodździ, što hladzicie, u vas niekatoryja akumulatarščyki hetyja, pačniecca pieradvybarnaja kampanija, i vy zrazumiejecie, čamu jany hvałtavali. Jany ŭsie vyłučylisia kandydatami ŭ deputaty. To bok im pofih hety akumulatarny zavod, jany zaŭtra hatovyja matanuć u Miensk i tut badziacca pa hetaj vulicy i cichieńka pavodzić ci ž hvałtam kryčać užo na mienskich płoščach», — skazaŭ kiraŭnik krainy.
Siońnia ŭ Breście na tradycyjnaje «karmleńnie hałuboŭ» sabrałasia, jak piša «Briestskaja hazieta», kala 130 čałaviek. Vydańnie pryvodzić šerah mierkavańniaŭ, jakija prahučali tam. Voś niekatoryja ź ich:
«Pratesty ŭ Breście pačalisia amal dva hady tamu. Tady nichto nie dumaŭ, što heta tak zaciahniecca. I tym bolš nichto nie zadumvaŭsia pra niejkija vybary. My adstojvajem svajo prava na čystaje pavietra, a nas nazyvajuć «akumulatarščykami», jakija kryčać na płoščach».
«Heta značyć kali ŭ kandydaty ŭ deputaty idzie «Mis-Biełaruś» (Maryja Vasilevič), jakoj 21 hod i joj jašče ŭroki vučyć treba, dyk heta narmalna. A kali našy aktyvisty sumlenna sabrali podpisy, kab pasprabavać patrapić u parłamient i tam padymać pytańni ekałohii — heta ŭžo ledź nie kryminał».
«Nie tak prosta troch čałaviek zrezali»
Uładzimir Maroz. Fota: Raman Kiślak.
Ahułam u parłamient sioleta bałatavalisia čatyry praciŭniki budaŭnictva akumulatarnaha zavodu ŭ Bieraści. Ale zarehistravany ź ich byŭ tolki Uładzimir Maroz.
Adzin z pretendentaŭ u deputaty Alaksandr Kabanaŭ, jakomu ŭłady admovili ŭ rehistracyi deputatam, prakamientavaŭ vykazvańnie kiraŭnika dziaržavy ŭ razmovie z karespandentam «Biełsata».
«Dla mianie naahuł było niečakana, što jon [Alaksandr Łukašenka. — Belsat.eu] na heta źviarnuŭ uvahu. Značyć, jaho hetaja tema chvaluje, na moj pohlad. I nie tak prosta troch čałaviek, značyć, zrezali. Bo zrezali pavodle nadumanych pryčynaŭ. I ja padazravaŭ, što heta ź Miensku kamanda, ale nie padazravaŭ, ź jakoj vyšyni», — adznačyŭ surazmoŭca.
Na dumku aktyvista, kiraŭniku Biełarusi treba moładź, jakaja «budzie ź im źbirać kavuny, siadzieć na futbole abciskacca», a praciŭniki akumulatarnaha zavodu b takim nie zajmalisia.
Razam z tym Alaksandr Kabanaŭ pryznaŭ peŭnuju pravatu Alaksandra Łukašenki adnosna frazy «im pofih hety akumulatarny zavod».
«U nas ža pretenzii nie da zavodu. U nas pretenzii da ŭładaŭ, jakija dapuścili hetaje budaŭnictva. Dapuścili kuču roznych parušeńniaŭ, jakija paŭtara hady ihnaravali heta ŭsio. Tamu ŭ nas hałoŭnyja pretenzii suprać ułady. I my suprać hetaha zavodu», — zajaviŭ surazmoŭca.
«Mnie patrebien nie pijar, a čysty horad»
Uładzimir Maroz, adziny z praciŭnikaŭ akumulatarnaha zavodu ŭ Bieraści, jakoha zarehistravali kandydatam u deputaty, raspavioŭ «Biełsatu», što fakt rehistracyi 1 z 4 lidaraŭ bieraściejskaha pratestu śviedčyć pra ŭmiašalnictva ŭładaŭ u chadu vybarčaha pracesu. Uładzimir adznačaje, što siarod svaich kalehaŭ jon najmieniej daśviedčany, mieniej viadomy. Tamu ŭłady, kab zrabić vyhlad demakratyčnaści, zarehistravali mienavita jaho.
«Miensk sapraŭdy najbolš pierśpiektyŭny horad u našaj krainie. Ale mnie patrebien nie bahaty Miensk, a mnie patrebien čysty moj horad. Mnie patrebna Bieraście. Nas dva hady nie čuli, a ciapier raptam pra nas zahavaryŭ kiraŭnik krainy, adznačyŭ, što my pijarymsia. Ale mnie taksama nie patrebien pijar. Mnie važniej zdaroŭje maich blizkich, majho maleńkaha dziciaci», — raspavioŭ «Biełsatu» Uładzimir Maroz.
Pradpryjemstva «AjPaŭer» paŭstała ŭ svabodnaj ekanamičnaj zonie «Bieraście», ale praz pratesty bieraściejcaŭ hetak i nie raspačało pracu. Miascovyja žychary zajaŭlali, što pradpryjemstva niebiaśpiečnaje dla navakolnaha asiarodździa.
Z 25 lutaha 2018 hoda praciŭniki zavodu źbirajucca kožnuju niadzielu ŭ centry Bieraścia, kab simvalična pakarmić hałuboŭ. Udzielniki hetych sustrečaŭ pryznajucca, što milicyjanty pahražajuć im raspravaju.
U červieni stała viadoma, što zavod nie adpaviadaje ekałahičnym patrabavańniam. U vyniku za kratami apynulisia prynamsi šeść čałaviek u miežach pravierki situacyi. U śledčym izalatary, miž inšaha, znachodzicca inviestar zavodu Viktar Lemiašeŭski.
